– Vil arbeida for utvida samarbeid
Kjøparen av Kvamnet AS trur handelen vil sikra lokal forankring og verdiskaping.
Dagleg leiar Erlend Nornes i Energiselskapet Hardanger AS (EH) er utanlands, så dagleg leiar Jan Ove Meling i Hardanger Energi Breiband AS svarar difor HF på spørsmål om oppkjøpet.
Meling påpeikar at Kvamnet og EH har samarbeidd lenge, og at verksemda har eigt ein femdel av Kvamnet i mange år.
– Lokal tilhøyrsle og eigarskap, og bevaring av lokale arbeidsplassar, er viktig for dei involverte partane. Me trur oppkjøpet kan sikra det, skriv han til HF.
Meling rosar seljarane for å leggja vekt på den lokale forankringa og for å ha omsut for dei tilsette.
Han opplyser at det vil vera naturleg å sjå etter synergiar mellom dei nye systerselskapa Kvamnet og Hardanger Energi Breiband. Dei vil arbeida for eit utvida samarbeid med kraftverket i Kvam, som er ein annan fiberleverandør i Hardanger, for å gje kundane i regionen eit endå betre tilbod.
Elles skal ikkje kundane merka stort av endringar som fylgje av kjøpet, forsikrar Meling.
– Dei same flinke folka som før vil arbeida i Kvamnet, og ha sin oppmøteplass i Kvam og Jondal. Kundane kan framleis forvente kort responstid og god kundesørvis frå kjekke fagfolk med lokal tilhøyrsle, skriv han.
