— Viktig å stella fint med han
«Dei steller så fint med bakkane, til glede for alle på «hi sio». For ein sjølvdisiplin!» skriv ein tipsar til HF.
Garden til Mona Kaldestad Ystebø (64) og Kurth Ystebø (65) på Kaldestad har vore i slekta til Mona sidan mellomalderen. Paret har drive garden sidan 1981.
I dag er det 40 vinterfôra sauer og éin hest på garden. Elles slår og steller Mona og Kurth rundt 50 mål med innmark og heimebeite til saman. Heile tida har bøndene i tillegg til «vanleg» slått slått og stelt det bratte brotet øvst mot skogen. Ein beitepussar hadde truleg fått utfordringar på det brattaste, så brotet vert fyrst slått med ei lita slåmaskin, før paret rakar det saman. Fotballsko med knottar er eigna fottøy.
— Garden ligg synleg i innseglinga til Norheimsund, så me ser det som viktig å stella han fint, seier Mona.
Med jobbar som lærar og fysioterapeut har det til tider vore ein krevjande hobby. No er paret snart pensjonistar. I år fekk Mona og Kurth god hjelp av barnebarnet Tuva Soldal og veninna Astrid Aksnes til å raka saman høyet.
