– Viktig å halda aktiviteten oppe
Jondal Precision Industries AS (JPI) har ikkje merka dei store konsekvensane av koronakrisa.
– Dagane er rolegare, men det er ikkje me som er verst ute å køyra. På lang sikt kan me få større problem, dersom aktiviteten i industrien går ned, seier eigar og dagleg leiar Håkon David Sandven.
Det JPI merkar best så langt, er problem med bemanninga. Nokre arbeidarar er gifte med sjukepleiarar, og må halda seg heime med born. Andre sit koronafaste i Polen. Men inntil vidare er produksjonen normal.
Artikkelen held fram under annonsen.
Med eit kraftig fall i oljeprisen ser Sandven for seg at både aktivitet og resultat kan verta redusert om ein månad eller to.
– Kor dramatisk det vert, vert berre gjetting. Per no har me greitt med arbeid, seier han.
JPI leverer ikkje mykje til oljebransjen, men oljeprisen påverkar marknaden. Viss det ikkje vert sett i gang nye prosjekt, kjem det færre ordrar.
Det viktige for JPI er at staten og kommunane set i gang og vidarefører prosjekt.
– Ein må ikkje halda att, men halda aktiviteten oppe innan vegarbeid, kraftutbygging, fiskeoppdrett og liknande, så langt det er mogleg. Det er det beste ein kan gjera for vår del, seier Sandven.
