– Viktig å få pengane i arbeid raskt

Samarbeidspartia – Ap, Sp, KrF, SV, MDG og V – har fleirtal i fylkestinget. Dei fremja framlegget då finansutvalet og fylkesutvalet 29. november drøfta budsjettet for 2023 og økonomiplanen for 2023–2027.

Vestland fylke har ansvar for 5.600 kilometer med fylkesveg, 2.083 bruer, 287 tunnelløp og 76 ferjekaiar. Det er stor trong for vedlikehald og tryggare vegar, ifylgje partia.

– Dersom me ikkje aukar dei årlege løyvingane, vil det ta om lag 70 år før ein får lagt ny asfalt i heile fylket, seier gruppeleiarane Sigrid Brattabø Handegard (Sp) Arve Helle (Ap) i ei pressemelding.

– Tenk praktisk!

Dei påpeikar at fleire bruer står i fare for å verta stengde. Mange ferjekaiar må oppgraderast til nye ferjer. Med meir ekstremvêr aukar rasfaren. Kvardags- og næringsvegar må tryggjast, meiner dei to.

Partia meiner ein må tenkja praktisk, sjå lengre strekningar under eitt og gjennomføra mindre punktutbetringar som kan bety mykje for tryggleik og framkome.

Gruppeleiarane synest det er viktig med ein god dialog med kommunane om tiltak som ikkje krev omfattande planlegging og som kan gjennomførast på kort sikt. Det er viktig å få pengane i arbeid raskt, seier dei to.

Samarbeidspartia håpar på breiast mogleg støtte i fylkestinget til ein solid vedlikehaldspakke. Det er trong for ei stor satsing på praktisk vegvedlikehald som kan tilpassast den lokale og regionale entreprenørmarknaden, meiner dei. Ei slik satsing vil òg vera viktig for ei entreprenørnæring som kan merka «tørke» når store investeringar vert utsett.

Pengane skal kunna brukast fleksibelt til både drift og mindre investeringstiltak. Handegard og Helle føreset at pengane i vegpakken vert nytta innan utgangen av 2025.

Fleire om ferjer

I møta tysdag presenterte fleirtalskoalisjonen også fram framlegget om to ferjer om sommaren mellom Jondal og Tørvikbygd frå og med 2023, eit nyhende Ap og Sp presenterte på ferjekaien i Jondal måndag. Kostnaden er stipulert til ti millionar kroner.

Det same framlegget inkluderte Frp i sitt budsjettframlegg. Sigbjørn Framnes (Frp) påpeika at partiet gjorde det same for to år sidan.

– Det er rett. Der kan me godt seia at me kjem etter, sa Natalia A. Golis (MDG).

H hadde ikkje noko klart budsjettframlegg og røysta difor for innstillinga til fylkesdirektøren, men lova å ta seg opp til fylkestinget drøftar saka 14. desember.

Frys bussprisane

Fleirtalet meiner budsjettframlegget er offensivt og inneber ei sterk satsing på kultur, opplæring og samferdsle i heile fylket. Her er nokre av punkta i budsjettet i tillegg til den nemnde vegpotten:

• 30 millionar til opprusting av undervisingsutstyr og læremiddel i vidaregåande skule, med bakgrunn i ei behovskartlegging i haust.

– Med dette sikrar me betre undervising i den offentlege skulen. Satsinga er særs viktig for dei yrkesfaglege linene og for vegen vidare for Vestland som eit yrkesfagfylke, skriv fleirtalskoalisjonen i pressemeldinga.

• Ei kollektivsatsing i form av ingen kutt i rutetilbodet, frysing av prisane på buss og bane i fyrste halvår i 2023, rekrutteringsstrategi for å få nye sjåførar, rabattkampanje på periodekort i august og september, og utvida familierabattordning.

– Skal me få ned klimagassutsleppa, er det avgjerande at fleire set frå seg bilen og tek buss og bane, skriv parti.