Vikøy-skule til nysgjerrigperfinale
– Vert born og unge påverka av skjermbruk?
Det er spørsmålet mellomtrinnet på Norheimsund Friskule i Vikøy har stilt seg i Nysgjerrigper-konkurransen 2020. Elevane har kome til finalen saman med 24 andre skular. Nysgjerrigper er eit prosjekt i regi av forskingsrådet.
– Me er svært spente på kva som skjer dei neste 14 dagane, skriv rektor Brit Gjerde Voster i ein e-post til HF.
Trass koronasituasjonen og stengde skular vart det levert inn godt over hundre bidrag til årets konkurranse.
Vinnaren av konkurransen vil verta annonsert og heidra gjennom ei virtuell prisutdeling tysdag 5. mai på både Facebook og Youtube. Resultata vil òg verta publisert på nysgjerrigper.no.
Gullvinnarane får 30.000 kroner og ei prisutdeling med show for heile skulen. Sølvvinnarane får 10.000 kroner.
Den nasjonale juryen, leia av forskar Bjørn Hallvard Samset, har jobben med å kåra den endelege vinnaren.
Mellom døma på prosjekt som elevar har forska på, er elgskremmaren, kvifor likar me å bada i varmt vatn – men å drikka kaldt vatn, kvifor born samlar på pinnar, isroser, papirfly, bakteriar på mobiltelefonen og mykje meir. Elevane vel sjølve kva dei vil forska på.
Finalistane kjem frå heile landet og er vurderte av juryar i fire regionar; nord, sør, vest og aust. I tillegg kjem nokre prosjekt frå norske skular i utlandet. Frå Vestland er det fem finalistar.
