Vidaregåande vil bada i Hardangerbadet
Kvam vidaregåande skule ønskjer symjeundervisning i Hardangerbadet. Det fører til nokre utfordringar.
Ifølgje eit brev tidlegare dagleg leiar i Hardangerbadet AS, Anita Storemark, sende til Kvam herad og Kvammabadet KF i desember, ønskjer Kvam vidaregåande skule å leiga tid til symjeundervisning i Hardangerbadet.
Skulen vil helst bada på onsdagar. Problemet er at dei vidaregåande skulane er fylkeskommunale, og på onsdagane skal anlegget brukast til kommunal bading.
Den vidaregåande skulen har difor inntil vidare måtta ta til takke med å bada saman med andre gjester i den kommersielle opningstida på torsdagar.
Natalie Nisamjan tok over jobben til Storemark 1. januar. Ho fortel at treningsbassenget har ledig kapasitet om føremiddagen på onsdagar.
– Men sidan dette er kommunal tid, kan ikkje Hardangerbadet AS leiga ut bassenget. Den vidaregåande skulen må eventuelt få til ein avtale med Kvam herad, seier ho.
Dette er ikkje den einaste utfordringa. Nokre onsdagar er det born i terapibassenget like før den ledige tida i treningsbassenget. Ein ønskjer ikkje at små born skal dela garderobe med ungdomar og unge vaksne.
Trass alle flokane er Nisamjan optimist.
– Alle partar ønskjer at me skal få dette til. Eg trur det er fullt mogleg å finna ei løysing, seier ho.
