Vidarefører matvertprosjekt i tre månader

Då pårørandeutvalet skipa til pårørandekafé på Øysteseheimen 13. april, orienterte konstituert leiar Anna Marie Frøseth om prosjektet med matvertar i pleie og omsorg. Det er politisk vedteke, eittårig prøveprosjekt på Øysteseheimen og Strandebarm omsorg som starta i januar.

For ei tid sidan vart matvertordninga drøfta i eit personalmøte på Øysteseheimen. Tilbakemeldingane frå dei tilsette er svært positive. Dei rapporterer om mellom anna mindre stress, betre tid, rolegare måltid, betre hygiene, god stemning kring maten, god og meir næringsrikmat, betre orden, mindre svinn, meir individtilpassa kost, meir stabil vekt på brukarane og betre matbudsjettkontroll. Dessutan er det mogeleg for dei som er tidleg vakne, å få frukost når dei står opp. Dimed er timane med nattefaste reduserte.

– Dette er utruleg positivt. Dette er det ikkje eg som leiar som seier, men dei som jobbar på golvet. Det viser at det er noko me må satsa på, sa Frøseth til dei pårørande.

– Dei pårørande vil ha ein plass ved bordet

Prosjektet varar altså i utgangspunktet berre ut året. Også helse- og omsorgssjef Terje Langeland var til stades på pårørandekafeen. Han kunne ikkje lova framhald, men forsikra om at han vil freista overtyda dei folkevalde om det. Vona er at effektane av satsinga vil gjera det mogeleg å vidareføra prosjektet innanfor dei ordinære rammene for pleie og omsorg, men sjefen kan ikkje lova det før dei folkevalde har sagt sitt i budsjetthandsaminga i desember.

– Me trur dette er vegen å gå og noko me bør få til på alle institusjonane i Kvam. Me trur at det ikkje er nokon veg utanom, sa Langeland.

Han røpte at han allereie har bestemt at prosjektet skal halda fram i tre månader inn i 2025, ettersom avklaringane ikkje kan koma før i desember. Slik kan ein sikra ein god overgang og ei skikkeleg evaluering, og i tillegg hindra at ein må seia opp tilsette og eventuelt tilsetja nye, understreka han.

Olav Per Tombre i pårørandeutvalet på Øysteseheimen sa at matvertsaka er eit typisk døme på eit tema som dei pårørande og brukarane bør få vera med og påverka gjennom eit samarbeidsutval.

– Tiltaka skal gjera kvardagen betre. Ideelt sett bør pasientar inn i eit samarbeidsutval der det lèt seg gjera. Om ikkje det går, skal dei pårørande vareta deira rettar, sa Tombre.