Vev nettverk med «venefamiliar»

Det sa prosjektleiar Sarifa Moola-Nernæs til dei frammøtte då Grannehjelpa inviterte til familiedag på Hardanger fartøyvernsenter sundag. Prosjektet «Venefamilie» vart sett i verk i haust, og har som mål å førebyggja utanforskap og å inkludera framandspråklege familiar i Kvam.

– Det er ikkje berre ved val ein skal «rekruttera» folk med innvandrarbakgrunn. Det er kvar dag. Ein kan helsa. Seia hei. Det er veldig enkelt, og veldig viktig for den andre personen. Me som kvemmingar må vera flinkare. Det er me som byggjer Kvam, seier Moola-Nernæs.

Åtte «kvammafamiliar» har meldt seg.

Avhengige av nettverk

Samlinga sundag var den fyrste i prosjektet. Tanken er å skapa ein trygg stad der folk kan møtast, verta kjende og skapa familienettverk, fortel Moola-Nernæs. Og ikkje minst praktisera norsk, legg ho til.

Mange som flyttar til Noreg utan familie, er heilt avhengige av å treffa nye folk og verta kjende med andre. Det gjer at ein får praktisert norsk og kanskje får eit «hei» på butikken. Det er utruleg viktig, fortel prosjektleiaren.

Moola-Nernæs er sjølv frå Sør-Afrika, og kom til Mundheim i 2008. Ho ser på seg sjølv som heldig. Folk tok henne imot og inkluderte henne. Slik ynskjer ho at det skal vera for fleire: at folk vert tekne imot, får støtte til å utvikla seg, og får sjansar, moglegheiter og nye vener. Familienettverk er minst like viktig når ein skal finna seg arbeid, fortel ho.

– Gøy og viktig

Den fyrste familiedagen vart arrangert i samarbeid med Hardanger fartøyvernsenter sundag 4. februar. I kafeen fekk born og vaksne informasjon om både prosjektet og fartøyvernsenteret, før aktivitetar tok til.

Ulike postar var sette ut, og familiane fekk mellom anna prøva å laga tau og svi «sponbilete». Etter aktivitetane stod fiskesuppe på menyen.

– Har du fått tilbakemeldingar?

– Familiane tykte det var gøy og viktig. Ein familie frå Sør-Sudan, til dømes, har budd her ei stund, men synest det er vanskeleg å verta kjend med folk. Det var veldig positivt for dei. Alle gledde seg til å ha nokon å møta, seier Moola-Nærnes måndag.

HF gjer merksam på at journalisten og familien hennar har meldt seg som venefamilie. Red.