Vestland fylkeskommune er årets nynorskkommune
Fylkeskommunen har eit grundig og gjennomtenkt arbeid på alle samfunnsområde, ifylgje juryen. Også Kvam herad fekk skryt under tildelinga.
– God og klar kommunikasjon er viktig. Det gjev eit godt grunnlag for meir openheit, tillit og samarbeid. Nynorsken må vera synleg, sa kultur- og likestillingsminister Anette Trettebergstuen då ho delte ut prisen måndag.
Prisvinnaren vart rosa for å ha nytta dei verkemidla som kommunen rår over, og for å ha gjort nynorsken synleg i det offentlege rommet, også når det har vore upopulært.
Ifylgje juryen har fylkeskommunen i ein ny kulturplan drøfta nynorsken og gjeve nynorsken ei relevant rolle som kulturberar. Fylkeskommunen har jobba grundig og systematisk for at dei tilsette skal kjenna til språklova, og for at dei skal ha kompetanse og høve til å fylgja opp.
– Det syner strategisk leiarskap. Nynorskarbeidet har ringverknader for heile regionen, sa Trettebergstuen.
Kvam herad vann altså ikkje, men vart likevel nemnt.
– Kvam herad har jobba med språket sidan 1998, og fortener særleg skryt for godt plan- og kommunikasjonsarbeid. Heradet har mellom anna omsett statleg informasjon om korona frå bokmål til nynorsk. Det syner sterk vilje, sa Trettebergstuen.
Prisutdelinga føregjekk på Litteraturhuset i Oslo. I juryen sat representantar for Språkrådet, Nynorsk kultursentrum, Landssamanslutninga av nynorskkommunar, Noregs Mållag og KS.
