Vestland får 50 millionar til utsleppskutt på hurtigbåtruter

Båtrutene mellom Bergen og Nordfjord og Bergen og Sogndal-Flåm skal bli utsleppsfrie, og får no pengane dei har søkt om for å kjøpe nye båtar.

Løyvinga frå Miljødirektoratet er ein del av Klimasats-ordninga, som har ei eiga tilskotsordning for hurtigbåtar.

– For oss er dette er ei særs viktig tildeling, og ei solid draghjelp for at Vestland skal kunne realisere utsleppsfrie hurtigbåtar snarast råd. Vi har ambisjonane, og denne tildelinga gjev oss avgjerande viktig finansiering for å kunne realisere dei, seier Jon Askeland, fylkesordførar i Vestland, på Vestland fylke sin nettstad.

20 000 tonn CO2

Satsinga skal gjelde båtrutene mellom Bergen og Nordfjord og Bergen og Sogndal-Flåm, som er mellom 245 og 277 kilometer lange. Dei er av dei største hurtigbåtrutene i Noreg målt i energiforbruk, og har eit berekna CO2-utslepp på 20 000 tonn CO2 per år samla. Det svarar til om lag 10 000 personbilar drivne med fossilt drivstoff.

Dei nye båtane er forventa å vere på vatnet i løpet av 2026. Vestland har ein nullvisjon på netto utslepp innan 2030.

(©NPK)