— Vert truleg avvist
Truleg vil ein søknad om stønad til fiberutbygging i Ytre Ålvik verta avvist. Nettet er nemleg for godt frå før.
Det opplyste rådmann Anita Hesthamar i formannskapsmøtet 7. oktober, etter at varaordførar Frode Nygård (Frp) hadde teke opp problemstillinga.
Bakgrunnen for saka er at innbyggjarar i bygda har oppmoda Kvam herad om å pressa på for å få fibernett i bygda.
Fylkeskommunen har ei eiga stønadsordning for utbygging av breiband i området der tiltaket ikkje er kommersielt lønsamt. Fristen for å søkja var i år i mai, men truleg kjem ei ny utlysing i 2022.
Ordninga gjeld utbygging av breiband, så ein kan ikkje setja fiber som vilkår. Ein eventuell søknad om stønad til fiberutbygging i Ytre Ålvik vil kanskje verta avvist på grunn av kriteria i ordninga, ifylgje Hesthamar.
Ifylgje rådmannen tilbyr Kvamnet i dag ein dataoverføringsfart på 50 megabit i sekundet over det trådlause nettet, vel å merka berre til dei som ser ein sendar på Kvamsøy eller på sørsida av fjorden. Det er 20 megabit fleire enn kriteriet for å få stønad gjennom ordninga.
Ifylgje henne vurderer Kvamnet AS både utbygging av fiber og byte av sendarar for å betra tilbodet, men selskapet er avhengig av bindande avtalar med kundar og truleg tilskot.
Hesthamar opplyste at Kvam herad er mellom kommunane med best breibandsutbygging, men dårlegast fiberutbygging.
