Verft vann pris for båt

– Det er kjekt å få anerkjenning for jobben me har gjort, seier salssjef Edmund Tolo ved Fjellstrand.

– Set standard

Verftet på Omastrand, som har designa og bygt verdas fyrste elektriske snøggbåt, og mobilitetsselskapet Kolumbus, som er eigar av «Medstraum», fekk prisen under ei messe i Hamburg tysdag.

Prisen, som skal fremja gode eigenskapar og løysingar i moderne skipsdrift- og bygging, vart delt ut av det maritime fagbladet Skipsrevyen.

– Skipsrevyen sine lesarar og jury vil heidra reiarlag, verft og design for å setja ein standard i det grøne skiftet. Framdriftssystem i nye skip har dei siste åra fått eit stadig større innslag av teknologi som fører til redusert forbruk av fossilt brensle og dermed reduserer utslepp av klimagassar. Årets vinnar føyer seg inn i rekkja, sa juryleiar Gustav Erik Blaalid, ifylgje bladet si nettside.

Det skal vera fyrste gong i historia at eit elektrisk fartøy har hatt ein fart høgare enn 23 knop, som er det som må til for at det skal kallast ein hurtigbåt, står det på nettsida. «Medstraum» skal ha kome heilt opp i 27 knop.

Publisiteten som utmerkinga gjev, vonar Tolo kan hjelpa arbeidet for vidare sal.

Båten, som sette kursen mot Rogaland i juli, skal gå i rute mellom Stavanger, Byøyene og Hommersåk i. Testkøyringa av ladeanlegget er i gang, og dersom alt går etter planen, vil snøggbåten truleg vera i drift i slutten av september, opplyser Tolo.

Tid til testing

Arbeidet med båten har vore ulikt tidlegare utviklingsarbeid, fortel Tolo.

– Sidan dette er ein del av eit EU-prosjekt, varar det mykje lenger enn andre prosjekt. Då får ein moglegheit til å testa mykje meir, seier han.

Tolo viser mellom anna til arbeidet med utvikling av skroget på båten. Kring to tusen ulike variantar av det same skroget har vorte testa, med endringar av breidde, djupn og lengde. Ifylgje han står ein mykje friare i korleis ein byggjer skroget når ein nyttar batteri og elektrisk motor, samanlikna med når ein byggjer dieselmotor. Batteriet kan plasserast over dekk, noko som gjer at ein kan ha lange og smale skrog.

– Det er det optimale for denne typen fartøy, seier Tolo.

Han hevdar også at det å ha batteriet over dekk vil betra tryggleiken på båten. Det kan mellom anna redusera faren for at noko skal gå gale dersom båten til dømes vert påkøyrd frå sida og det kjem vatn inn i skroget, forklarar han.

Ifylgje Tolo har Fjellstrand fleire prosjekt på gang. I tillegg til å selja inn prosjekt i Noreg vekkjer verksemda internasjonal interesse.

Godt år i fjor

Dei siste åra, som har vore prega av særleg pandemien, har verksemda slite med å skaffa nok oppdrag og få nok inntekter til å dekkja dei faste utgiftene, fortel Tolo.

2021 vart eit langt betre år for verksemda, med ein driftsmargin på 6,2 prosent. I 2020 var marginen minus 12,7 prosent.

Fjellstrand står også bak verdas fyrste elektriske ferje, MF «Ampere», som vart kåra til Ship of the year i 2014, ifylgje Skipsrevyen.