Verft feira sertifikat
ISO 9001 og ISO 14001 høyrest kanskje ikkje så spanande ut. Men det er spanande nok til at Fjellstrand AS feira med kake.
Like før påske vart det klart at Fjellstrand hadde fått eit ISO-sertifikat innan kvalitet (ISO 9001) og eit innan miljø (ISO 14001). Torsdag vart dette feira med kake, fortel kvalitets- og HMS-ansvarleg Lars Kristian Bu.
ISO 9001 stadfestar at verksemda oppfyller tilrådde standardar for kvalitet, effektivitet og kundefokus, ifølgje Bu. ISO 14001 syner at verksemda er klar over korleis den påverkar miljøet, og at den jobbar med å redusera påverknaden.
Bu fortel at Fjellstrand har jobba hardt i om lag eitt år for å få sertifikata. Som løn for strevet får verksemda eit konkurransefortrinn.
– Ein del oppdragsgjevarar krev desse sertifikata. Dei gjer at me kan konkurrera om fleire oppdrag, seier han.
Ifølgje Store Norske Leksikon er ISO er ein verdsomfattande samskipnad av nasjonale standardiseringsorgan. ISO lagar og publiserer internasjonale standardar.
