Verdas første elektriske snøggbåt er ferdig
Torsdag sette MS «Medstraum» kursen frå Fjellstrand til Stavanger. På seinsommaren skal båten setjast i rutedrift.
Dette kjem fram i ei pressemelding. Fjellstrand AS er ei av verksemdene som har vore med og laga katamaranen som ifølgje meldinga er verdas første elektriske snøggbåt.
Rogaland fylkeskommune eig «Medstraum» gjennom mobilitetsselskapet Kolumbus. Båten skal gå i rute mellom Stavanger, Byøyene og Hommersåk så snart ein er ferdig med testing på strekninga.
– Det har vore både utfordrande og lærerikt å byggja dette fartøyet, det har jo aldri vore gjort før nokon stad. Hurtigbåtar krev mykje energi, difor var det viktig å gjera «Medstraum» både lettare og mykje meir effektiv enn andre hurtigbåtar i marknaden. Det har me klart, og det gjer oss både stolte og glade. Det er revolusjonerande at eit så stort fartøy kan gå i 23 knop i ein heil time – berre ved hjelp av elektrisitet, seier salssjef Edmund Tolo ved Fjellstrand, ifølgje pressemeldinga.
Hurtigbåtar som nyttar fossilt drivstoff er utsleppsverstingar. Sjølv om Kolumbus har få hurtigbåtar i flåten, kjem «Medstraum» til å gjera store positive utslag i klimarekneskapen.
– Me er svært glade for å endeleg få levert det nye flaggskipet i verda når det kjem til hurtigbåtar. Kolumbus har eit mål om å vera langt framme i å ta i bruk ny og miljøvenleg teknologi. Sjølv om «Medstraum» skal ta over den minst energikrevjande ruta vår, vil me kutta utslepp på om lag 1.500 tonn CO₂, seier prosjektleiar Mikal Dahle i Kolumbus.
