– Ventar framleis på klargjering
Det nye uteområdet ved Norheimsund skule skulle få både gjerde mot vegen og eit sikringsnett ved ballbingen i haustferien, men lite har skjedd.
Tysdag etter haustferien var området likevel teke i bruk av elevar ved skulen, etter at det hadde stått ferdig, men unytta i lang tid.
Rektor Linda Haugland Jondahl, som før ferien ikkje ynskte å ta i bruk området før det var sikra med permanent gjerde og nett mot Gamle Dalavegen, har no valt å gjera det motsette.
– Elevane ynskte å ta området i bruk, og skulen meiner at det er greitt å vera i området så lenge det er sikring ut mot veg, skriv ho i ein e-post til HF.
Ho presiserer at skulen er glad for det nye leikeområdet, og at elevar og tilsette har gledd seg lenge til å kunna ta det i bruk. Skulen håpar sjølvsagt at det kjem opp nytt gjerde så fort som mogleg, legg ho til.
Den mellombelse sikringa Jondahl nemner, er eit anleggsgjerde som er sett opp langs Gamle Dalavegen. Det har stått der lenge. Gjerdet skal hindra at elevar spring rett ut i vegen.
Prosjektleiar for Kvam herad, Bjarte Rasmussen i ABO Plan & Arkitektur AS, skriv til HF at området ikkje er overteke frå entreprenøren enno.
– Me har difor ikkje kunna setja i verk dette arbeidet, skriv han.
Les også:
