Venskapskommune tek Ukraina-initiativ
– Me burde setja i gang eit prosjekt for å hjelpa våre vener i Ukraina.
Det vart konklusjonen etter ein diskusjon mellom Agnar Høysæter frå Kvam; Valdas Tumelis, nestleiar i administrasjonen i Marijampole; Martin Vorkinn i Lesja kommune og representantar for Červonograd i Ukraina.
Marijampole er venskapskommunen til Kvam i Litauen, og diskusjonen fann stad under Marijampole City Days 2022.
Mogeleg donatorar
Prosjektet kan koordinerast av Marijampole kommune. Det skriv Tumelis i eit straumbrev til ordførar i Kvam, Torgeir Næss.
Målet med prosjektet skal, etter ein analyse av kva for humanitær hjelp som trengst, vera å tilby bistand i form av pengar og varer og transportera dette til Ukraina.
Donatorar kan vera lokalsamfunna, næringslivet, organisasjonar og skular. Dette kan ein diskutera i eit digitalt møte i næraste framtid, føreslår Tumelis.
Ordførar i Marijampole, Povilas Isoda, støttar prosjektet og ber Kvam herad om å delta.
– Me ville vera takksame om de kunne diskutera prosjektideen og lata oss høyra avgjerda dykkar, skriv Tumelis.
Fyrst i haust
Næss har informert dei folkevalde og administrasjonen om planane til Tumelis. Ei endeleg avgjerd må takast av heradsstyret, som har neste møte fyrst 27. september, skriv Næss til Tumelis.
Tumelis skriv at Marijampole kommune vonar på eit positivt svar frå heradsstyret. Han ber om at det vert skipa til eit digitalt møte med ein kontakt i heradet, så ein kan byrja diskutera dei praktiske sidene av prosjektet.
Leiar for samfunn, næring og kultur i heradet, Jon Nedkvitne, er peika ut til kontaktperson for Ukraina-prosjektet.
