Venskap vann over virus og væte

Regnet ausa ned. Fem minutt seinare skar sola gjennom ein sprekk i skylaget.

Vêret var med andre ord av det litt upålitelege slaget då lastebilar og bussar frå fjern og nær samlast på fyllingane på Torsnes i helga. Vel å merka kunne ein strengt tala lita på at det for det meste regna.

Til alt hell har Anthun hand om den nye lagerhallen i næringsområdet. Der samlast gjestene til frukost, lunsj, middag og anna samvær under tak medan dropane fall på utsida. Pils vart drukke, lapskaus ete, lastebilbøker selde og lastebilar omsnakka då HF var innom laurdag ettermiddag. Serveringa stod Torsnes Ungdomslag for. Tidlegare har laget berre servert middag, men i år tok det seg av alt matstellet. På kvelden stod sjåførspesialiteten hamburgar på middagsmenyen.

Litt virusprega

Kjernen var altså den same som før, men nokre punkt skilde seg markant frå tidlegare utgåver av treffet. For det fyrste var det seinsommar; normalt vert treffet skipa til i juni. For det andre var talet på både køyretøy og menneske monaleg lågare. I fjor var over tusen gjester registrerte då HF var innom om lag på same tid på laurdagen. I år var berre 200 på gjestelista, 33 påmelde køyretøy kom ikkje, og berre vel 30 utanforståande hadde vore innom laurdag for å sjå på dei utstilte doningane.

Vêret får ein del av skulda, men hovudårsaka er koronaviruset. Anthun legg ikkje skjul på at pandemien prega treffet. Ein del gjester dukka ikkje opp, anten dei hadde sett nyhenda eller vêrmeldinga.

Sjå biletserie:

Anthun seier kommunen var skeptisk til arrangementet, men at arrangørane ikkje var i tvil om at dei ville gjennomføra som planlagt. Den eine grunnen er trongen for eit sosialt møtepunkt; det eine lastebiltreffet etter det andre er nemleg avlyst i år. Nettopp det trur han kan vera grunnen til at fleire titals bilar kom til Torsnes allereie torsdag, dagen før treffet offisielt tok til.

– Det er tydeleg at det er eit sakn at noko skjer. Dei er veldig positive. Me vart tekne på senga, seier Anthun.

– Treningsarena

Den andre grunnen er at han meiner folk rett og slett treng trening i å møtast og samstundes retta seg etter smittevernføringane. Anthun legg ikkje skjul på at ein del gløymer avstandsreglane litt når dei har fått litt pils innanbords. Venlege oppmodingar og handsprit er, som elles i samfunnet, boteråda.

– Me må prøva å ha hendingar, så me får trena oss på smittevern. Om ikkje me har noko som skjer, får ikkje publikum øvd seg. Me må endra vanane våre, og då treng me slike arenaer. Mange tenkjer nok at dette er risikabelt og uansvarleg, og at me tek ein sjanse. Me meiner det stikk motsette, og meiner det er ansvarleg å gje folk ein arena utanom buss og tog å øva på, seier han.

Han meiner samfunnet kjem til å verta liggjande brakk lenge om ikkje folk ven seg til at dei må halda avstand og halda seg reine.

– Me må øva. Eg bommar sjølv på det, sjølv om eg er veldig medviten om det. Anten det gjeld musikkarrangement eller anna, må me oppmoda arrangørane til å prøva å dra ting i gang. Då treng me at helsestyresmaktene aksepterer at me gjennomfører slike ting, seier Anthun.

Omfattande prosjekt

– Du skal vel kommentera grillen min?

Jan-Tore Sture frå Bøvågen i Alver har openbert litt vel høge forventingar til køyretøykunnskapane til HF-utsendingen. Kanskje er det ikkje så rart, for sjølv kjenner han kvar kvadratcentimeter av Scania-bussen frå 1971 ut og inn.

Det har nemleg vorte nokre timar, for å ta lite i, med mekking etter at han kjøpte doningen i 2007. Med kjøpet auka interessa for eldre køyretøy, medan lommeboka skrumpa.

– Eg torer ikkje tenkja på kor mange kroner og timar det har gått med, seier han.

Han tregar likevel ikkje på innsatsen. Bilmekanikaren har bytt ut det meste, for bussen, som vart nytta som campingvogn i fleire tiår før han overtok han, var nokså livstrøytt då han fekk ny eigar. No er det meste på stell. Den 49 år gamle bussen har mellom anna kjøleskap, kjøken med gasskomfyr, sitjegruppe og overnattingsplassar. Den framtida hadde han kanskje ikkje sett for seg då han i si tid putra rundt i rute for Firda Billag.

Vende grillen heim

Alver har vore på Hardangerfjordtreffet kvar gong. Han kjenner nokre av årets deltakarar og kjem i prat med nye vener, sjølv om viruset set sitt preg på den sosiale omgangen. Folk er meir varsame og held avstand, seier han.

Han kom til Torsnes fredag, men valde å setja kursen mot jondalsferja allereie laurdag ettermiddag. Også ein del andre sjåførar, mellom andre den eine av tre danskar som hadde teke turen, valde å venda heim ein dag før tida. Årsaka var vêret. Det var meldt ausande regn heile kvelden. Men om han var litt i tvil om han skulle reisa, og turen vart kort, trega ikkje strilen på han.

– Det er godt å byta stove, seier han, og lukkar bussdøra.