– Velkomne, men …
Elevane frå Tørvikbygd er velkomne til Strandebarm skule, ifylgje dei tilsette.
Om skulen i Tørvikbygd vert nedlagd, kan det vera eit godt alternativ å senda elevane til Strandebarm, meiner dei tilsette. Det går fram av eit høyringsinnspel i saka om nedlegging.
Grunngjevinga for den varme velkomsten er at skulen har nok plass inne og ute, idrettshall, symjebasseng og bibliotek, at fleire elevar vil styrkja det sosiale miljøet, at fagmiljøet vert større, og at skulen i Norheimsund har allereie sprengd kapasitet.
Vidare minner dei tilsette om at det er kortare veg til Strandebarm enn til Kvam ungdomsskule.
– Dersom elevane allereie reiser ut til Strandebarm frå og med 1. klasse, er elevane godt kjende når dei startar på ungdomsskulen. Dette bidreg til tryggleik og kontinuitet, skriv dei.
Personalet understrekar at alle involverte må få førebu seg godt til overgangen til ny skule, og at elevane må få tett oppfylging av fleire vaksne.
– Dette er avgjerande for at elevane skal kjenna seg velkomne og få ein god start. AIle ressursar knytte til elevane og undervisninga må bli overførte til Strandebarm, slik at dei nye elevane ikkje mistar tilbod dei har krav på. Strandebarm skule har fysisk kapasitet til å ta imot fleire elevar, men har ikkje nok ressursar til å ta imot Tørvikbygd skule, skriv dei.
Elles tek dei tilsette til orde for eigen transport til og frå skulen for dei yngste elevane som går på skulefritidsordninga, eventuelt å syta for skulefritidsordning i Tørvikbygd barnehage om morgonen.
Les også:
