— Vekst i Ullensvang, men ikkje i Kvam
Talet på kommersielle overnattingar i Ullensvang auka med 8,5 prosent frå juli i fjor til juli i år. I Kvam var utviklinga negativ.
Det opplyser Visit Hardangerfjord AS, som har samanfatta dei ferske julitala frå Statistisk sentralbyrå og nettstaden statistikknett.no.
Samla auka talet på kommersielle overnattingar med 3,9 prosent i Noreg, medan Vestland hadde om lag same tal som i fjor, opplyser reiselivsselskapet.
Medan talet altså steig i både Ullensvang, Eidfjord (+16,1 prosent) og Kvinnherad (+11,4 prosent), gjekk det i Kvam og Samnanger under eitt ned med 12,4 prosent.
Ifylgje direktør Andreas Skogseth i Visit Hardangerfjord kan nedgangen i Kvam skuldast andre faktorar enn at etterspurnaden minka. Ifylgje han har eit hotell opplyst om ein auke i belegget på 12 prosent frå juli i fjor til juli i år. Romprisen på hotellet har auka med 250 kroner. I snitt har romprisen auka frå kring 1.350 til 1.750 kroner.
Den største veksten finn ein i segmenta camping og hytter. Fleire hotell har hatt avgrensa kapasitet som fylgje av pandemien og mangel på tilsette.
Ifylgje Skogseth ser det så langt ut til at august i år var betre enn den same månaden i fjor, medan utsiktene i haust og vinter er usikre. Skogseth opplyser at Visit Hardangerfjord i haust vil kartleggja statistikk frå mellom anna hotell, camping, aktivitetar, transportørar og attraksjonar.
