Veit du kven du pratar med på internett?

Har du sett noko ekkelt eller skummelt på internett? Eit overgrep på nett er at vaksne lurer born til å gjera ting med kroppen sin. Eller dei sender bilete av tissen sin.

Å gjera slikt er ikkje lov. Ingen skal oppleva sånt. For å gjera internett tryggare, er det viktig å melda frå til ein vaksen om det skjer.

Den du snakkar med, kan verka morosam og snill. Nokre vert litt forelska òg. Men veit du alltid kven du snakkar med?

– Alle kan lata som

– Me tenkjer kanskje at det er tryggare i Kvam. Det er det ikkje, seier Ann May Garen.

Ann May jobbar i politiet i Kvam. Ho fortel at ein overgripar lyg. Han kan seia at han er like gamal som deg. Men ofte er overgriparar vaksne.

– Alle kan lata som om dei er ein annan. Det er nesten umogleg å vita kven du snakkar med, seier Ann May.

Personen kan senda bilete av andre enn seg sjølv. Og det er lett å lata som om du er ein annan. Difor bør du ikkje seia kven du er og kor du bur. Ikkje til folk på chatten som du ikkje kjenner.

Gje beskjed!

Om nokon sender ekle bilete, må du melda frå til ein vaksen. Viss du ikkje vil seia det til ein forelder, kan du finna ein annan vaksen du er trygg på.

– Du kan ta eit skjermbilete, men det er berre lov om du skal visa det til ein vaksen eller politiet. Og ikkje svar på slike meldingar! seier Ann May.

Viss ein person ber deg gjera ting med kroppen din som du ikkje vil, må du seia ifrå.

Å senda nakenbilete til andre er ikkje lurt. Ville du ha teke bilete av tissen din på do og så vist det til alle på skulen etterpå? Det er eigentleg det som skjer. Du vil aldri vita kven som får sjå biletet.

Har du opplevd noko ekkelt på nett, men ikkje sagt det til nokon? Eller kanskje du ikkje har det så bra heime?

Då kan du ringa 116 111 eller senda ein SMS til 417 16 111. Det er ein alarmtelefon for born som er open heile døgeret. Du kan også ringja om du trur nokon ikkje har det bra.