Vegvesenet: Størst fare for kø på vegen onsdag og søndag i påska

Skal du ut av byen i påska, bør du gjere det før onsdag. Det er vanlegvis ein av dei mest travle utfartsdagane på vegane i høgtida, ifølgje Statens vegvesen.

Skal du heim igjen, er det lurt å vente til andre påskedag, opplyser Vegvesenet i ei pressemelding.

Dei har innhenta tal frå dei to siste åra og rekna seg fram til at onsdag og søndag i påska blir dei travlaste dagane på vegen.

Men mange raude dagar fører også til at det er mindre forseinkingar på vegane enn vanleg, seier avdelingsdirektør Nils Karbø.

– Ser vi påskeveka under eitt er det faktisk den veka i året med desidert minst forseinkingar på vegane. Det er fordi både torsdag og fredag er raude dagar, i tillegg til at det er mindre kvardagstrafikk dei andre dagane.

Dei kan ikkje garantere for at ein unngår kø om ein ventar med heimreisa til andre påskedag.

– Det kan vere lurt å vente med heimreisa til andre påskedag viss du vil unngå kø, men det er dessverre ingen garanti. Vêr- og føreforhold og andre hendingar kan påverke trafikksituasjonen lokalt, minner Karbø om.

Han ber alle leggje inn god tidsmargin og køyre forsiktig, slik at ein unngår alvorlege ulykker i påsketrafikken.

(©NPK)