Vegvesenet følgjer opp nye krav til bilverkstader

Bilverkstadene har hatt frist til 1. november i år for å tilpasse seg den nye verkstadforskrifta, som tok til å gjelde frå 1. november 2020. No skal Statens vegvesen følgje opp dei som ikkje har fått ny godkjenning.

Frå 1. november er det berre verkstader med ei spesiell godkjenning, skadeverkstad 02, som har lov til å reparere køyretøy med omfattande skadar. Mindre kosmetiske skadar kan framleis reparerast av ordinære verkstader. Verkstadene må tilpasse seg krava i forskrifta eller avvikle verkstaddrifta si, skriv Statens vegvesen på sine nettsider.

– Dei skjerpa krava skal sikre at køyretøy med strukturelle skadar som krev målretting, berre blir reparerte av verkstader og personar som har særleg kompetanse og utstyr. Dette kravet skal sikre at køyretøy er like trafikk- og driftssikre etter ein skadereparasjon som dei var før skaden. Endringane skal gjere det enklare både for bransje og publikum å vite kven som har løyve til å gjere kva. Tydelege og strenge krav til både verkstadene og kompetansen til teknisk leiar skal også bidra til like konkurransevilkår og til å hindre køyretøykriminalitet i verkstadbransjen, seier Shamaila Noreen i Statens vegvesen.

Alle som skal vere tekniske leiarar og avløysar for teknisk leiar, skal ha ei personleg godkjenning frå Statens vegvesen.

Verkstadkategoriane bilverkstad, bilskadeverkstad, bilelektro-/drivstoffanleggverkstad og bildieselverkstad blir borte. Verkstader som i dag har ein eller fleire av desse godkjenningane og som skal vidareføre drifta, må kontakte Statens vegvesen for å få ny verkstadgodkjenning.

– Vi oppfordrar verkstadane som framleis ikkje har gjort noko, om å ta kontakt med Statens vegvesen innan 1. november. Verkstader som ikkje har fått ny godkjenning vil frå denne datoen drive ulovleg. Statens vegvesen vil følgje opp verksemdene som ikkje har søkt ny godkjenning, seier Noreen.

(©NPK)