– Vegstandarden står til stryk i Distrikts-Noreg

Over halvparten av bilistane i Distrikts-Noreg meiner at vegane dei brukar til dagleg er dårleg haldne ved like.

Folk si vurdering av vegane blir meir og meir negativ jo lenger ut i distrikta ein kjem

På landsbasis svarer berre 34 prosent at vegane dei køyrer på til dagleg er godt haldne ved like. I distrikta er 58 prosent misfornøgde med vedlikehaldet.

Det viser ei ny undersøking gjort av Norstat for NAF (Noregs Automobil-Forbund), der 1103 bilistar er spurt om korleis dei oppfattar vegstandarden der dei bur. I Distrikts-Noreg svarer heile 55 prosent at vegane ikkje er av god nok standard for trafikken som køyrer på dei.

På landsbasis svarer tre av fire at dei vil at politikarane skal prioritere vegvedlikehald. Kontrasten til delen som vil ha meir nybygging av veg er stor: 37 prosent.

Analysar NAF har gjort av vegnettet viser at om lag ein firedel av fylkesvegane er for smale samanlikna med den standarden dei skulle hatt om dei vart bygd i dag. Også på riksvegane er det store manglar, mellom anna mange strekningar som skulle hatt midtoppmerking eller midtdelar.

– Vegstandarden er rett og slett forbikøyrt av trafikkutviklinga. Vi treng ei massiv satsing på vedlikehald og fornying, og NAF er bekymra for at kutt i vegbudsjetta vil sinke denne satsinga, seier Ingunn Handagard, pressesjef i NAF, i ei pressemelding.

Regjeringa har i Hurdalsplattforma lova å kartleggje forfallet på riks- og fylkesvegar og lage ein plan for å redusere etterslepet på vedlikehald. NAF støttar tiltaket, men etterlyser høgare ambisjonar frå regjeringa.

– Det held ikkje å redusere etterslepet, målet må vere å fjerne forfallet. Fornying og vedlikehald har altfor lenge vore prioritert ned. Det handlar om breiddeutvidingar, midtoppmerking, rydding av sideterreng og rassikring, seier Handagard.

(©NPK)