Vegmur rasa ut

Fylkesvegen strekkjer seg frå hovudvegen på Fosse til Haukås, like nedom garden til Oma. Han oppdaga skaden måndag ettermiddag, og melde frå til Vegtrafikksentralen. Både vegmuren og delar av vegen hadde sige ned mellom Tufta og Sjusete.

Hjå Vegtrafikksentralen er det opplyst att vegen no er stengd for køyretøy over 3,5 tonn. Det får konsekvensar for mjølkebonden. Onsdag gjekk 4.000 liter mjølk tapt då tankbilen ikkje kom seg til gards. I pengar er det snakk om om lag 30.000 kroner, fortel Haukås. Tapet får han dekt av Tine, men det kjennest likevel ikkje bra å tømma ut så mykje «mat».

– Omfattande arbeid

Roger Lemme jobbar som byggjeleiar for vedlikehald, drift og beredskap i eininga for infrastruktur og veg i Vestland fylke. Han seier det er vanskeleg å svara på kva tid vegen kan opna att for store bilar. På Vegtrafikksentralen sine nettsider står det at det vil vera stengt til 12. juli.

– Det er trasig for mjølkebonden. Me skal prøva å hjelpa han så godt me kan, seier Lemme.

Entreprenøren byrja arbeidet med vegen torsdag. Planen er fyrst å utvida ei grøft og leggja vegen litt lenger inn i terrenget for å få betre plass til passerande bilar. Så startar arbeidet med å byggja opp muren att, fortel han.

– Det er eit omfattande arbeid. Me reknar med at neste veke går. I mellomtida vert det manuell dirigering og gjennomkøyring til visse tider, seier Lemme.

Om lastebilar må venta til arbeidet er heilt ferdig eller får passera når vegen er utvida, er ikkje råd å svara på enno. Det kjem an på grunnforholda, seier han.

At vegen rasa ut, kom ikkje som ei overrasking på Oma. Murane langs vegen er låge, gamle og dårlege, og vegbana har sige over tid, fortel han. Det gjeld fleire stader på Haukåsvegen.

Allereie før det rasa ut hadde vegvesenet sett opp plastskilt med refleks for at køyretøy skulle køyra lenger vekk frå vegmuren.

Ras både her og der

Lemme stadfestar at tilstanden på vegen er «så som så». Det er ein gammal veg, og han er bygd på «gamlemåten», seier han. Trafikkbelastninga som har vore dei siste åra – spesielt i samband med ein del tømmertransport – har nok teke på. Vegen er ikkje bygd for slike laster, seier Lemme.

– Har de konkrete planar om å utbetra andre punkt på vegen?

– Ikkje per no, men me fylgjer med. Og så er det planlagt nytt dekke på vegen i år. Heile vegen skal asfalterast, opplyser Lemme.

– Om ikkje dei utsette punkta langs vegen vert utbetra før det rasar, kjem dette til å skje igjen, seier Oma, og legg til at vegen òg er skuleveg.

Og det rasar ikkje berre ut på nedsida. Stein, jord og anna kjem ovanfrå rett som det er, fortel han. Sist i vinter.

– Då fekk eg ikkje slaktebilen opp på grunn av eit tre som har rasa ut i vegbana, seier Oma.