– Vegen er smal og svingete
Innstranda Grendautval melder om at det er smalt, manglande lys og mykje hjort langs vegane på Innstranda.
Det går fram av eit innspel til den kommunale trafikksikringsplanen.
Utvalet meiner det bør setjast opp ein trafikkspegel ved krysset mellom fylkesveg 576 og Kolltveitvegen. Utvalet har her sett farlege situasjonar som kunne vore hindra med ein spegel.
Utvalet har fleire punkt det ynskjer merksemd om. Mellom Innstranda grendehus og Røyrvik manglar trafikklys. Når det er arrangement i grendehuset, er det mange fotgjengarar i området, påpeikar utvalet. Det er mykje hjort og fleire kryssingspunkt i området. Det bør difor setjast i verk tiltak for å hindra hjortepåkøyrslar, til dømes å rydda bort skog, skilta eller setja opp gjerde, meiner grendeutvalet.
Vegen mellom Røyrvik og Hjartnes er svært smal og svingete, og bør utvidast, påpeikar utvalet. Nord for grendehuset er vegen delvis smal og har berre eitt køyrefelt.
Utvalet meiner at tiltaka i den gamle reguleringsplanen for området mellom Tørvikbygd og Innstranda grendehus bør finansierast og realiserast.
Kommunale Tangavegen har fleire farlege parti og manglar i stor grad rekkverk, og har stor trafikk av semitrailerar. Fleire gonger har han vore stengd fordi store køyretøy har kome utanfor køyrebanen. Spesielt gjeld dette stigingane ned til og opp frå Ljonesvågen, ifylgje planinnspelet.
Den kommunale vegen til Ugletveit manglar fleire stader rekkverk eller støypekant. Ein del stader har støypekanten sige nedover, slik at han ikkje har den opphavlege funksjonen, skriv utvalet.
