– Veg vil få monaleg høgare trafikk
Konsekvensen av den tilrådde «armen» frå E134 til Bergen er at dette vert ein mogleg framtidig stamveg mellom aust og vest.
Det skriv Hans Jørgen Andersen i Kvam Næringsråd i eit innspel til Vestland fylkeskommune om reguleringsplanen for tunnelen frå Steinsdalen til Eikedalen.
Det tilrådde alternativet i konseptvalutgreiinga (KVU) frå Statens vegvesen er «konsept 1». Det omfattar traseen Jøsendal–Odda–Jondal– Trengereid, og omfattar tunnel under Kvamskogen.
Andersen skriv at konsekvensen av innstillinga vil vera høgare årsdøgntrafikk (ADT) og nye krav til utforming og trafikktryggleik. Statens vegvesen føreslår ei trinnvis utbygging, med ein ÅDT på 5.000–6.000 etter full utbygging. Dette er monaleg høgare enn ÅDT-tala som ligg til grunn for planarbeidet i dag, skriv Andersen.
I ein presentasjon av KVU 22. august stilte vegvesenet sjølv spørsmålet om eksisterande tunnelar kan handtera veksten. Andersen spør om prosjektleiinga vurderer ei oppgradering av tunnelprofilen for å ta omsyn til framtidig auke i ÅDT. Han spør òg korleis prosjektleiinga vurderer konsekvensane av ei mogleg omdefinering av fylkesveg 49 til framtidig riks- eller europaveg og eventuelle krav til dimensjonering av tunnelen. Andersen undrar om prosjektleiinga vil ta omsyn til auka trong for å plassera massar ved oppgradering av tunnelprofilen.
Rådet meiner at gang- og sykkelveg frå Steinsdalen til Kvamskogen må vera på plass før oppstart av arbeidet med tunnel under Kvamskogen, og at trafikken gjennom Tokagjelet må påverka minst mogeleg av anleggsarbeidt.
I KVU er det skissert ein tunnel frå Steinsdalen til ein plass i nærleiken av Tørvikbygd i siste etappe av utbygginga av konsept 1. Tveiten og Andersen ber om at dette vert teke med som bakgrunnsinformasjon i samband med planarbeidet.
Dei to forstår det slik at prosjektleiinga ser på forskjellige løysingar for tunnelpåhogg i Steinsdalen.
– Det er positivt, og det er viktig å finna ei løysing som er god for nær- og fjerntrafikk, best mogleg for lokalmiljøet og dei trafikale løysingane, inneber minst mogleg øydeleggjande inngrep mot busetnad og næring og gjer det mogleg med god trafikkavvikling i anleggsperioden, skriv Andersen.
Om vegen igjen vert stengd, som 2013, vil det ha det store negative konsekvensar for næringslivet i Kvam, skriv Andersen.
Det tilrådde konseptet kan redusera avstanden mellom Bergen og Jøsendal frå 149 til 122 kilometer, og reisetida frå vel tre timar til 1 time og 41 minutt.
