Veg vart stengd etter steinsprang

Ei steinblokk, ifylgje Vegtrafikksentralen vest på om lag éin kubikkmeter, hadde falle frå lia ovanfor og landa i fylkesvegen. I tillegg hamna fleire mindre steinblokker i og ved vegen.

Litt etter klokka 10 vart vegen rydda av Kvam Maskin og Transport AS. Klokka 10.19, for å vera presis, fekk dei fyrste bilane passera.

Då hadde geolog Håvard Fremgaard Fiksen i Vestland fylkeskommune nett vore og sett på staden. Han konstaterte med hjelp av drone at losneområdet låg om lag 270 meter oppe i lia. Det som losna i fjellsida, delte seg på vegen ned i fleire mindre steinar. 

Det såg ikkje ut til å vera meir på veg frå losneområdet, og det var forsvarleg å opna vegen att, ifylgje geologen frå Øystese.

Den fyrste meldinga frå sentralen kom klokka 07.18. Det vart då opplyst at hendinga var i Steinstø, men det var feil.