Veg opna etter steinsprang
Fylkesveg 79 vart stengd mellom Steinstøberget og Djupevik i Ytre Ålvik i Kvam etter eit steinsprang litt før klokka 06 natt til laurdag.
Ei steinblokk på om lag éin kubikkmeter hadde falle frå lia ovanfor og landa i fylkesvegen. I tillegg hamna fleire mindre steinblokker i og ved vegen.
Litt etter klokka 10 vart vegen rydda av Kvam Maskin og Transport AS for å opna vegen att. Klokka 10.19 fekk dei fyrste bilane passera.
Då hadde geolog Håvard Fremgaard Fiksen i Vestland fylkeskommune vore og sett på staden. Han konstaterte med hjelp av drone at losneområdet låg om lag 270 meter oppe i lia. Det som losna i fjellsida, delte seg på vegen ned i fleire mindre steinar.
Det såg ikkje ut til å vera meir på veg frå losneområdet, og det var greitt å opna vegen att, ifylgje geologen frå Kvam.
Den fyrste meldinga frå sentralen kom klokka 07.18. Det vart då opplyst at hendinga var i Steinstø, men det var altså feil.
