Veg nynorsk mot annan kompetanse
Rådmannen i Kvam har gjort unntak frå nynorskplikta for effektivitetens skuld.
– Rapportar og brev frå barnevernstenesta i Kvam er ikkje alltid skrivne på nynorsk.
Det skriv leiar i Kvam Mållag, Randi Jåstad, i eit straumbrev til rådmannen.
Ho har fått tips om saka frå enkelte nynorskbrukarar.
«I Kvam herad er det offisielle styringsmålet nynorsk. Alle tilsette i alle kommunale organ pliktar å nytta nynorsk skriftspråk i tenesta», heiter det i språkprofilen til heradet.
Jåstad spør om nokon av dei tilsette i Kvam herad har dispensasjon frå krava i mållova og språkprofilen, og om kva som vert gjort for å hjelpa tilsette som ikkje har god nok kunnskap i skriftleg nynorsk.
– Har halde kurs
Rådmann Anita Hesthamar svarar at heradet set inn fleire tiltak for medarbeidarar som ikkje har hatt nynorsk som hovudmål, mellom anna eigne kurs for bokmålsbrukarar og tilbod om omsetjing.
Det synest rådmannen ho har fått gode resultat av, og ho er godt nøgd med innsatsen og engasjementet frå medarbeidarane.
Samstundes må heradet vega språkkrav mot det å få rekruttert og behalda kompetente medarbeidarar, og sikra at dei får gjennomført arbeidet på ein god og effektiv måte. Dette gjeld i høgste grad i barnevernet, skriv rådmannen.
Det stemmer difor at ho her har gjort eit unntak. Unntaket er rett nok lite, då det berre gjeld i nokre få høve og med eit avgrensa tal lesarar. Ho vonar difor at mållaget har forståing for dette.
Ber om større innsats
Størst utfordring på målfeltet ser rådmannen når det gjeld omfang og oppdateringar av tilbodet om læremateriell på nynorsk til born og unge, både digitalt og i papir- og lydformat.
Ho viser til at det tidlegare har vore møte mellom mållaget og oppveksteininga om temaet, og at ein har fått nynorskbøker til barnehagane.
– Me vil likevel setja stor pris på om de har høve til å auka trykket på nasjonalt nivå og mot leverandørar i dykkar kanalar. Her treng me ein stor, felles innsats for å lukkast med å sikra og utvida tilbodet, skriv ho.
– De har kompetansen
Jåstad svarar at styret i mållaget forstår at fagleg tyngd er viktigast når heradet tilset. Ho forstår også at det i ein overgangsperiode kan vera tenleg å gje unntak frå regelen om at alt skal skrivast på nynorsk. Viss slike unntak vert gjevne på ubestemd tid, derimot, er laget redd for at det kan skapa presedens, og at plikta til å nytta nynorsk vert vatna ut.
– Me veit at det finst folk med solid kompetanse i nynorsk på alle avdelingane i heradet. Er det ikkje mogleg at nokon kan kvalitetssikra nynorsken i skriv som vert sende frå barnevernet? spør Jåstad.
Ho skriv at ein skulle tru at alle som har utdanning på høgskulenivå og vel å arbeida i ein nynorskkommune, er så dyktige at dei kan læra seg nynorsk viss dei brukar litt tid på det og får bod hjelp. Ho reknar med at dei tilsette har vist vilje til dette når dei har søkt jobb i Kvam.
Mållaget er elles samd med rådmannen i at laget og heradet har eit felles ansvar for å arbeida for å sikra at borna får alle læremiddel på nynorsk.
– Kvam Mållag vil gjerne støtta Kvam herad i arbeidet med å sikra nynorsk språk på alle område, og me vonar heradet og mållaget kan samarbeida godt, skriv Jåstad.
