Veg er asfaltert, men ikkje utbetra
Tidlegare i år rasa ein vegmur ut ved Porshauglia i Tørvikbygd. Fylkesvegen har fått nytt dekke, men vegfundamentet er ikkje utbetra.
Det opplyser Hildegunn Furdal, seniorrådgjevar i avdelinga for vegforvalting i Vestland Fylkeskommune.
Varaordførar Frode Nygård (Frp) seier at vegbana er blitt heva og at det er lagt ny asfalt.
– Fylkeskommunen faldar hendene og håpar det held ei stund, men problemet vil koma att. Det er løyst på den billegaste og mest lettvinte måten, seier han.
Ifylgje Furdal er det lagt nytt dekke for å redusera slag og komprimering som fylgje av trafikken, og for å hindra meir vatn å trengja inn i vegkroppen.
Ho opplyser at det er sendt budsjettsøknad om utbetring av vegfundamentet, og vonar denne skal verta godkjend slik at utbetringa kan starta til våren.
– Me er ikkje særs uroa for at vegen skal gje etter. Med det tiltaket me har gjort trur me at me har lengt levetida til vegen til arbeidet med forsterkinga startar opp, skriv Furdal i ein e-post.
Vegen er ein del av strekninga på fylkesveg 576 frå Tørvikbygd til Mundheim som er prioritert i Regional transportplan. Furdal opplyser at det er starta eit forprosjekt, ein moglegheitsstudie, for strekninga. Monika Øksnes leier prosjektet.
Målet er, ifylgje Furdal, at studiet skal leverast i løpet av våren, med atterhald om tildelte midlar neste år. Ho opplyser at dette skal handsamast i fylkestinget i desember og at fylkeskommunen vil ha dialog med kommunen undervegs. Arbeidet etter studien avheng av økonomi og omfanget av dei tilrådde tiltaka, til dømes om det trengst ein reguleringsplan, opplyser ho.
Les også:
