Våttkort i vått vêr
Ein fargerik gjeng lyste opp det som elles var ein dag av det grå slaget i Holmsund i Norheimsund laurdag.
Sju deltakarar hadde nemleg meldt seg på og var klare for å kursa seg i kajakkpadling då HF var innom. Kurset er ikkje naudsynt for å padla kajakk i seg sjølv, men det gjev mellom anna moglegheit til å leiga kajakk hjå kommersielle aktørar, fortel arrangør og instruktør Stig Færø-Landlie. Også kona hans, Sigrid Landlie, stilte som instruktør.
Føremiddagen baud på ein teoretisk del før deltakarane fekk prøva seg i praksis. Teorien handlar stort sett om tryggleik, fortel Færø-Landlie.
– Det viktigaste i dag er å verta trygg i kajakken og trygg på at om det skjer noko, har du verktøy til å ordna det, anten du er aleine eller med fleire, seier han.
– Anbefalast
Kjersti Bjørke var mellom deltakarane på kurset. Ho har padla kajakk av og på i vel tjue år, fortel ho, men utan eit såkalla «våttkort», som ein får etter fullført kurs. Bjørke var endåtil med på å starta Os Padleklubb for 17 år sidan.
Klubben trena mykje i sjø og basseng, men erfaringa tel likevel lite om ho vil leiga kajakk på ferie, til dømes. Dei aller fleste aktørane krev «våttkort».
Bjørke vart veldig glad for kurstilbodet lokalt, og er nøgd med det ho fekk oppleva.
– Det beste for meg var å få trena på kamerat- og eigenredning i sjø. Utover det var det sjølvsagt kjekt selskap med matpause på Sandvenholmen, med entusiastiske sambygdingar i alle aldrar, seier Bjørke.
Det er bra at det no vert litt meir liv i den lokale kajakklubben, synest ho, med dei engasjerte kursleiarane i spissen.
– Kurset anbefalast på det sterkaste, seier Bjørke.
– Skjer med «alle»
Våttkortet er eit slags bevis på at ein har fått innføring i grunnleggjande teknikk, tryggleik og risikovurdering. Dei fleste av deltakarane var heilt ferske med padleåra. Og det er ikkje nok å verta kjend berre med henne. Også det å koma seg oppi og ut av kajakken kan vera utfordrande. Det beste er å koma seg oppi på ei strand, meiner instruktørane.
Det dei fleste gruar seg til, er å «gå rundt», seier Færø-Landlie.
Med det meiner han å kvelva med kajakken og hamna under vatn. Det er slikt som skjer, og det skjer ikkje berre med nybyrjarar, fortel han. Sjølv dei som har padla mykje i røff sjø, går rundt.
– Det er ikkje farleg så lenge du er førebudd på det. Og det er det me skal læra i dag – at det går heilt greitt om det skjer.
Så snart deltakarane kom seg i kajakkane og ut på bukta, byrja dei å øva på ulike teknikkar for best å manøvrera farkosten. Det vart mellom anna øvd på å gå opp i fart, bremsa og halda seg stabil i sjøen.
Då alle kjende seg trygge, padla gjengen inn mot Norheimsund. Etter ein pause på Sandvenholmen avslutta gjengen med kameratredning. Alle deltakarane kom seg heilskinna gjennom kurset, forsikrar arrangøren.
Les også:
