Vaskar tøy for harde livet

Dagleg leiar ved Hardanger AKS (HA) i Øystese har merka ein monaleg auke i volumet på vaskeriet.

– Eg tippar det er ein auke på vel 40 prosent, seier Aksnes.

HA er stengt for ordinær drift som eit tiltak mot spreiing av koronaviruset.

Men 13 ordinært tilsette – administrasjonen, avdelingsleiarar og instruktørar – er på jobb, medan 68 arbeidskollegaer sit heime og ventar.

– Vår høgaste prioritet no er å halda vaskeriet i gang. Me vil i dagane og vekene som kjem gjera vårt ytste for å dekkja behovet pleie og omsorg har for reint institusjonstøy, skriv HA på Facebook.

Det tyder at det meste av arbeidskrafta er knytt opp mot vaskeriet.

Pause i drifta

Aksnes har sendt ut eit informasjonsskriv der det står at HA og leiargruppa i helse og omsorg i Kvam herad avgjorde at verksemda skulle halda stengt frå fredag 13. mars. Det gjeld til og med påske. Dei ordinært tilsette vil vera tilgjengelege på telefon og e-post som vanleg.

– Konklusjonen er at me i samråd med Kvam herad vil vurdera situasjonen kontinuerleg. Ei ny melding vil verta send ut når me kan opna for ordinær drift, seier Aksnes.

Han seier det er dei nasjonale føringane om smitteverntiltak som gjer ordinær drift uforsvarleg.

– Me er rett og slett for mange folk. Å halda to meter avstand og få heile bunten til å vaska hendene, kan vera ei utfordring, seier Aksnes.

Berga av vaskeri

Når det gjeld økonomien, klarar HA seg på kort sikt. Men dreg krisa ut i tid, så forventar Aksnes raude tal. Kjøkenet er hardast råka. Der er det inga keitering- eller middagsproduksjon. Jobbfrukta er borte, og det er ingen faste leveringar. Kontraktar om matlevering er signerte, men ligg på vent.

Det som reddar økonomien, er vaskeriet. Det er fordi kvemmingane har klarare fokus på hygiene og smittevern. Og då er termisk og kjemisk desinfisering eit produkt som sel.

Reint økonomisk er det eit spørsmål om dei auka inntektene til vaskeriet klarar å kompensera for bortfallet av kjøkenet.

Går glipp av messer

Elles har verksemda òg sett ein liten auke i volumet på treavdelinga og distribusjonsavdelinga.

– Eg kan ikkje peika på kvifor. Kanskje folk fokuserer meir på uteområde og hagen i desse koronatider, seier den daglege leiaren.

HA plar vera aktive på handverks- og bustadmesser. Desse fell no vekk. Difor må HA annonsera i aviser og på internett. Når det gjeld turistsesongen, reknar sjefen med at campingplassane og hotella ikkje kjem til å tinga så mykje sengetøy som dei normalt gjer. No er det eit monaleg sal av sengetøy.

Økonomien er litt uoversiktleg i den forstand at det på nokre område kjem inn fleire ordrar enn tidlegare, medan nokre faste ting fell ifrå, seier Aksnes. Til dømes må bilistane på ferjene til Fjord1 sitja i bilane under overfarten og ikkje samlast i kantina. Difor får ikkje HA levert mat til reiarlaget.

Saknar arbeidarane

HA tilbyr framleis levering av ved og andre produkt.

Alle brukarane får betalt som normalt. Krisa påverkar ikkje økonomien for brukarane eller dei ordinært tilsette.

– Men det er klart at me får nye direktiv frå Nav heile tida, og det utviklar seg nesten frå veke til veke, seier Aksnes.

Det som er utfordringa i produksjonen, er mangelen på arbeidskraft.

– Det er viktig å påpeika at jobben er her og ventar på brukarane til ting vert normale att, seier HA-leiaren.

– Til alle våre tilsette som no er heime: Me ser fram til å få dykk tilbake i jobb og praksis igjen så snart det vert vurdert forsvarleg. Det er tomt her utan dykk! skriv Aksnes på Facebook.

Overskot i fjor

Årsrekneskapen for 2019 er klar. Styreleiar Nils Frode Skaar konstaterer at HA for fjoråret enda med eit overskot på 400.000 kroner.

– Det er eg godt nøgd med. I tillegg kjem at me har ein rekneskap som me har full tillit til. Me er sikre på at det er korrekt. Me har ordna opp i alt gamalt rot og teke alle dei avskrivingane me skal ta.

– Kva er grunnen til overskotet, trur du?

– Det er mange forklaringar på det. Ei god drift, vonar eg, er det viktigaste. Me har fått ei svært dyktig leiing som har fungert gjennom heile året. Og så har me svært flinke folk elles. HA har fått nye oppdrag, men har framleis eit likviditetsproblem. Men båten ber no, seier Skaar.

– Den største utfordringa er å ta vare på brukarane. Det er føremålet med heile verksemda – å ta vare på og aktivisera brukarane på ein fornuftig måte.

HA skal halda eit styremøte for å handsama rekneskapen, og planleggja generalforsamlinga.

– Men i desse tider avventar me litt. Me får sjå korleis me ligg an når det er passert påsken. Det er ikkje heilt uproblematisk å møtast slik det er no, seier styreleiaren.