Vart utsett for dataangrep. Blir pressa for pengar.

Onsdag denne veka blei Lingalaks råka av eit dataangrep.

«Vondsinna aktørar» kom seg inn i selskapet sine interne system og begynte med å samla inn data.

Dette heldt på i tre timar før angrepet blei stoppa, ifølge ei pressemelding Lingalaks sende onsdag.

Knytt til Russland

Konsernsjef Erlend Haugarvoll opplyser at hackarane kan ha henta ut sensitiv informasjon om så mange som 300 tilsette, i tillegg til 500 kundar. fram til 2021.

Det skal gjelda informasjon som personnummer, e-postadresser og telefonnummer.

– Me går gjennom akkurat kor mange det er snakk om no. Det er ikkje alle som har informasjon liggande i systemet, seier Haugarvoll.

Særleg personnummeret kan vera alvorleg å mista. Med det kan ein for eksempel komma seg inn i banken, flytta pengar og oppretta kontoar.

Ikkje alle som er råka av angrepet, har blitt varsla enno.

Angrepet kom frå ei IP-adresse som dei datakunnige «assosierer» med Russland, seier Haugarvoll.

– Me har også fått e-post i etterkant som krev betaling for å levera tilbake informasjonen, men me har fått råd om å ikkje etterkomma kravet. Det finst uansett ingen garantiar for at dei held ord, seier Haugarvoll.

Kor mykje pengar dei krev, veit ikkje Haugarvoll.

– Eg har ikkje sett så nøye på e-posten, for å seia det slik.

Meldt til politiet

Måten hackarane kom seg inn i systemet på, skal vera at dei fann nokre sårbare brukarar som ikkje hadde høgt nok tryggleiksnivå, seier Haugarvoll.

Det er mange fleire private selskap som har opplevd liknande angrep dei siste åra, seier Haugarvoll.

– Me kjem til å jobba ytterlegare med datatryggleiken og tetta alle hol.

I pressemeldinga onsdag seier Lingalaks at angrepet er meldt til politiet. Også Datatilsynet er varsla.