– Varsla pålegg om retting

Det kjem fram i eit førehandsvarsel om pålegg om retting som er sendt til verksemda 6. mai. Alternativt kan verksemda søkja å få utførte tiltak godkjende, men ut frå kjennskapen kommunen har til saka, er utfallet høgst usikkert, står det i skrivet.

Kommunen bad om ei utgreiing frå Ullensvang Holding i februar, men fekk ikkje svar innan fristen. Det hende etter at Naturvernforbundet Hardanger slo alarm om aktiviteten i hyttefeltet i ei bekymringsmelding til kommunen.

I byrjinga av april vart det gjennomført ei synfaring i hyttefeltet. Der fann kommunen fleire tiltak han meiner er i strid med reguleringsplanen.

24 meter lang mur

Den felles parkeringsplassen til hyttefeltet har ei anna og større utforming enn det som er godkjent, og ein stor mur som er oppført like ved, er ikkje søkt om, meiner kommunen. Det same gjeld eit planert område tilknytt muren.

Også tre vegar og ein mur til er opparbeidd utan løyve, meiner kommunen. Muren er 9,3 meter lang og to meter høg.

Ullensvang kommune meiner i tillegg at det er hogd hole eiker i området. Naturmangfaldlova seier at det skal takast særskilt omsyn til utvalde naturtypar, som til dømes slike eiker. Ein rapport om funna er send til oppfylging hjå Miljødirektoratet, Statens naturoppsyn og Statsforvaltaren i Vestland, skriv kommunen.

– Skal førast tilbake

Om ikkje forholda vert førte tilbake til lovlege former innan 31. juli, kan kommunen vedta eit pålegg om retting. Med retting meiner kommunen tilbakeføring til godkjend reguleringsplan og godkjende byggjeløyve, skriv kommunalsjef Kristian Bondhus-Jensen i førehandsvarselet.

Mellom anna må muren ved parkeringsplassen fjernast, det planerte arealet tilknytt muren førast tilbake, og vegane førast tilbake til stiar på 1–1,5 meter breidd, for å nemna noko. Snittbreidda på vegen frå parkeringsplassen og oppover i feltet er i dag 3,8 meter, ifylgje rapporten.

Då HF kontakta dagleg leiar i Ullensvang Holding, Tore Eiken, i samband med at kommunen bad om ei utgreiing, sa entreprenøren at alt skal vera søkt om i området. Også arkitekt Alv Martin Vangdal, som er ansvarleg søkjar, sa at verksemda har fått godkjent veg opp til tomtene det vert arbeidd med. Det er anleggsvegar som skal førast tilbake til stiar, meiner arkitekten.