Variert Sp-liste i Ullensvang
Ullensvang Senterparti heldt nominasjonsmøte på Buer i Odda måndag 27. februar. Seks jondølingar stiller til val.
Listeframlegget har 39 namn med geografisk spreiing i heile kommunen. Kvinnene er i fleirtal med 51 prosent, og snittalderen er 43 år. Både erfarne folkevalde og nye kandidatar har fått plass på lista, ifylgje Sigrid Brattabø Handegard.
Nominasjonsnemnda har lagt vekt på få med kandidatar med ulik bakgrunn. Her er folk frå privat næringsliv, sjølvstendig næringsdrivande, offentleg sektor, oppvekst og helse, og fleire frå dei store bedriftene i Odda.
– Me er ekstra glade for engasjementet fleire ungdomar syner for å stå på lista og vera med og utvikla heile kommunen, fortel Handegard, som står på den klassiske heidersplassen nedst på lista.
Dei fire øvste på lista er førehandsprioriterte og kjende frå før, med ordførarkandidat Lajla-Margrethe Lindskog-Lund og varaordførarkandidat Tina Nesse Mannsåker i spissen.
