– Var openbert rusa

Det påståtte brotet kjem fram i ein tilleggsrapport frå ein kontroll den aktuelle natta. Utestaden skal ha servert alkohol til ein gjest som var eller som burde ha vore vurdert til å vera openbert rusa, meiner skjenkjekontrollen.

Varsla om prikkar

Den aktuelle kvelden hadde Holmatun AS søkt om utvida skjenkjeareal i Øystese idrettshall i samband med ein konsert. Skjenkjekontrollørane skriv i rapporten at vaktene tok ut fleire openbert rusa personar i løpet av kvelden, og at dei hadde god kommunikasjon og gjorde ein solid jobb. Skjenkjekontrollørane observerte ikkje brot på alkohollova.

Men då kontrollørane gjekk til Tyst like ved etter at konserten var slutt, vart ein av dei utkasta personane observert i lokalet. Gjesten skal ha stått svært ustødig, med opphovna, blanke auge, og vart observert som openbert rusa, ifylgje rapporten. Han skal så ha flytta seg til baren, der han fekk kjøpt tre glas med alkoholhaldig drikke. Ein vakt kom så til, gjekk etter gjesten, tok frå han drikkevarene og viste han ut frå skjenkjestaden, skriv kontrollørane.

– Vurderinga skal skje før skjenking, skriv kontrollørane i rapporten.

Holmatun AS vart varsla om ei mogleg straff i form av på fire såkalla prikkar. Om summen av prikkar kjem opp i 12 innan to år, kan løyvet inndragast i éi veke.

– Misforstått

Holmatun fekk frist til å uttala seg innan 6. desember, noko selskapet gjorde. I ein e-post 4. desember skriv Morten Garen, styremedlem, medeigar og sikringsleiar i Holmatun, at han ikkje er ueinig i vurderingane, men at forholda er misforståtte.

Garen, som sjølv kontrollerte tilstanden til gjesten i løpet av kvelden, meiner det er andre årsaker til åtferda og det litt vinglande kroppsspråket enn alkoholpåverknad. Dette utdjupar han i skrivet.

Kvam herad valde likevel å gje verksemda fire prikkar.

– Kvam herad meiner at gjesten etter observasjonar stod fram som openbert rusa. Gjesten skulle difor ikkje fått skjenkt alkohol, står det i vedtaket.

Holmatun har klaga til Statsforvaltaren på vedtaket.