– Vår konklusjon er at leksene må vekk

Elevane ved 9. trinn på skulen har delteke i prosjektet «Juniorforskar». Ifølgje avdelingsleiar Kari Torpe har elevane ved hjelp av intervju og spørjeskjema undersøkt tema som trivsel, motivasjon og læring på skulen. Torsdag 9. februar presenterte gruppene kva dei hadde funne for medelevar, lærarar, politikarar og tilsette i administrasjonen i Kvam herad.

Før elevane presenterte funna minte kontaktlærar Arne Vines gjestene om at viktig informasjon venta.

– Her får de eit førstehands innblikk problemstillingar dei unge opplever på kroppen kvar dag, sa han.

– Ja til gruppearbeid

Gruppa til Celina Huun, Ariel Stryker-Vassnes, Felix Rai Kjepso og Fredrik Froestad Sleire har mellom anna prøvd å finna ut kor motiverte elevane er på ungdomsskulen samanlikna med då dei gjekk på barneskulen. For å finna svar, har dei intervjua dei om lag 20 elevar på 8. trinn og 10. trinn.

– Me har stilt dei motivasjonsrelaterte spørsmål om til dømes karakterar, lekser, læring og skulen for å finna ut kva dei tykkjer, fortel Celina.

Mellom konklusjonane var at elevar på 8. trinn generelt likar lærarane betre enn elevane på 10. trinn.

Funna til gruppa tyder òg på at elevane er meir positive til gruppearbeid, film og tankekart enn til tradisjonell tavleundervisning som læremetode.

Meir mobil, mindre lekser

Andre funn er at mange elevar tykkjer det burde vore lov å bruka mobiltelefonen meir på skulen, og at mange tykkjer utvalet i kantina burde vore betre. Mange elevar ønskjer seg fleire sosiale aktivitetar på skulen.

Både denne gruppa og andre grupper fann ut at skepsisen til lekser er stor blant elevane. Mange elevar ønskjer heller å bruka meir tid til leksearbeid på skulen enn å ta skulearbeidet med seg heim.

– Me føler at om det hadde vore mindre lekser, hadde folk vorte meir motiverte for skulen, seier Celina.

– Trur du at de vert høyrde?

– Eg håpar det. Mange av gruppene har gode argument for at me må ha mindre lekser.

– Interessante funn

Torpe tykkjer funna til elevane er interessante.

– Slik eg tolkar svara, tilbyr mange elevar å bruka meir tid på skulen dersom det betyr at dei slepp lekser. Mange ønskjer ikkje å reisa heim og så byrja med skulearbeid att på fritida, seier Torpe.

Ikkje alle funna til elevane var like overraskande.

– Det at elevane ønskjer meir variert undervisning, meir praktisk undervisning og meir undervisning ute, visste me frå før. Og her samsvarar funna til elevane med anna forsking. Mykje forsking tyder på at det at det å vera i fysisk aktivitet kan førebyggja til dømes angst, seier ho.

– Vil ta tak

Torpe beit seg merke i at nokre elevar tok til orde for meir tid til sosialt samvær på skulen.

– For mange er truleg skulen ein viktig sosial arena. Dei unge møtest kanskje ikkje like mykje på fritida som tidlegare. Dei har digital kontakt, men ikkje fysisk. Då kan eg forstå at dei ønskjer meir tid til å vera sosiale, seier ho.

– Kjem funna til å føra til endringar?

– Me kan ikkje gjera noko med alt, men eg håpar me i alle fall kan ta tak i noko av det elevane har funne ut, seier Torpe.

«Juniorforskar» er eit samarbeid mellom kommunane Kvam, Ullensvang, Ulvik og Eidfjord, Voss og Samnanger og Universitetet i Bergen.