– Var kjend med alderen til fornærma
Ein mann som var tiltala for ei seksuell handling med eit barn under 16 år, sa seg delvis skuldig i retten.
Saka vart handsama i Hordaland tingrett like etter nyttår.
Tiltaleavgjerda hadde to postar. Den eine gjekk ut på at mannen på ein fest våren 2022 skulle ha kyssa den fornærma og teke henne på brysta både innanfor og utanpå kleda. Påtalemakta meinte dessutan at mannen hadde halde fornærma mellom beina. Den andre posten galdt kyssing på munnen og nedover til brysta ein annan stad i Kvam same kveld.
Mannen sa seg delvis skuldig. Han avviste at han hadde teke fornærma på brysta og mellom beina på festen. Derimot erkjende han å ha kyssa fornærma og teke henne på brysta då dei var på den andre staden seinare på kvelden. Tre vitne forklara seg i retten.
Tingretten frifann mannen for det som gjekk føre seg på festen. For den andre handlinga vart mannen dømd til å gjennomføra 40 timar samfunnsstraff og betala fornærma 25.000 kroner i oppreisningserstatning. Domen er ikkje rettskraftig.
Retten la i formildande retning vekt på at mannen erkjende straffskuld for delar av tiltalen, noko som har letta prosessen for fornærma. Det vart lagt vekt på at saka har lege i over eit år, noko som har vore ei belasting for alle partar.
Saka illustrerer på ein god måte kvifor det er naudsynt å ha det vernet straffelova gjev mindreårige mot seksuelle handlingar av denne typen, påpeikar tingretten.
Ifylgje domen var mannen kjend med alderen til jenta, og alle seksuelle handlingar mot barn under 16 år er straffbare. Det gjeld uavhengig av om barnet har delteke, samtykt eller på anna vis ikkje avvist handlinga. Å ta på kjønnsorgan eller bryst er ei seksuell handling uavhengig av om det skjer utanpå eller innanfor kleda, skriv tingretten.
