Valdsmann fekk strengare straff

Ein mann frå Kvam vart i Hordaland tingrett i haust dømd til fengsel i 16 månader for vald og trugsmål mot ektefellen. Mannen fekk kontaktforbod. Domen vart anka, og no har Gulating lagmannsrett teke avgjerd.

Lagmannsretten dømde mannen til fengsel i 18 månader. 10 av dei var på vilkår.

I retten heldt den fornærma fast ved at krenkingane av henne som gav grunnlag for tingrettsdomen, skjedde då mannen var påverka av alkohol på kveldstid. På dagtid var mannen snill, roleg og sakleg, forklara ho.

Mannen har sidan august i fjor vore rusfri, ifylgje domen. Kontaktforbodet vart oppheva i februar i år, og paret har teke opp att samlivet. Kvinna ynskte ikkje kontaktforbodet, fordi ho ynskte å ha høve til å hjelpa mannen. Retten meinte at forbodet var naudsynt for å redusera risikoen for nye straffbare handlingar.

I forklaringa sa ektefellen at mannen er tilgjeven, og ho gav uttrykk for at ho ynskte at mannen vart vurdert på mildaste måte.

Påtalemakta la, som i tingretten, ned påstand om fengsel i 18 månader. Før ankeforhandlinga vart det opplyst at påtalemakta ikkje ville leggja ned påstand om kontaktforbod.

Retten la mellom anna vekt på at mannen er under rehabilitering og at risikoen for tilbakefall kan auka som fylgje av ei lengre fengselsstraff. Vidare la retten vekt på at mannen, utan at han erkjende straffskuld før under ankeforhandlinga, aldri har tvila på forklaringa til ektefellen.