Vaktmeistrane for trivnad

Lena Tonning og Sara Sandven-Burnett har fått dei to rykande ferske, treårige prosjektstilingane ved Nav Kvam.

Målet med prosjektet er å sikra ein stabil busituasjon og auka bukvaliteten til dei som bur i kommunalt formidla bustader. Tenestene som deltek i prosjektet, er Nav sosialteneste, Nav flyktningteneste, FDV (forvalting, drift og vedlikehald) og ROP (teneste for rus og psykisk helse).

Søknad gav utteljing

Terje Langeland er leiar for 19 tilsette i Nav Kvam, og har ansvar for både statsdelen og den kommunale delen. Han fortel at Statsforvaltaren lyste ut tilskotsmidlar til Utvikling av sosiale tenester i Nav. Langeland og Sigrid Karin Dolve, fagleiar i sosialtenesta, spurde seg kva dei ynskte å få til. Bakgrunnen er den vide føremålsparagrafen i sosialtenestelova. Det er nemleg mykje Nav skal hjelpa til med, fortel Langeland.

Enden på visa vart ein søknad med bakgrunn i at ein ynskte å heva det bustadsosiale arbeidet og bidra til verdige busituasjonar. Ein ynskte eit tverrfagleg prosjekt, for ein såg at dette ikkje handlar berre om Nav.

Resultatet vart altså lønsmidlar til to stillingar.

– Og no sit desse to flinke damene her som me er veldig glade for å ha tilsett, seier Langeland.

Tonning er utdanna sjukepleiar og er bonde, medan kollegaen har bakgrunn mellom anna frå ambulansetenesta og bufellesskap. Båe er glade i å vera saman med andre, å vera ute og gjera praktisk arbeid, men må òg rekna med litt kontorarbeid.

Tonning byrja i jobben i oktober, medan Sandven-Burnett byrja i januar.

Lågterskeltilbod

Så langt har prosjektet fått gode tilbakemeldingar.

– Me kan alltid be om råd eller hjelp hjå dei andre tenestene, og me møter velvillige og fleksible kollegaer, seier Tonning.

At samarbeidet mellom tenestene er godt, trur vaktmeistrane vil koma leigetakarane til gode.

Tonning og Sandven-Burnett ynskjer å vera lett tilgjengelege som kontaktpersonar for leigetakarane. Dei hjelper til med enkle praktiske oppgåver i bustaden, gjerne saman med dei som bur der. Ting dei ikkje kan svara på eller ordna sjølve, melder dei vidare. Det vonar dei vil bidra til at folk har trygge, gode bustader. Leigetakarane kan kontakta trivselsvaktmeistrane direkte eller gjennom ei av tenestene som er involverte i prosjektet.

– Målet for oss er at folk skal trivast så godt som mogleg og ha det godt i bustadene. Dei skal vera stolte over heimen sin, seier Sandven-Burnett.

Branntilsyn

Som utleigar skal Kvam herad føra eit obligatorisk, årleg branntilsyn i bustadene. Trivselsvaktmeistrane byter batteri i brannvarslarane, sikrar at dei fungerer og testar brannslangar eller kontrollerer slukkingsutstyr saman med leigetakaren.

– Me opplever at leigetakarane tek vel imot oss, og har gode samtalar om til dømes rømmingsvegar, matlagingsvanar og komfyrvakter, seier vaktmeistrane.

– Når me allereie er der, er det lett for dei å ta opp andre feil eller manglar som me kan melda vidare, seier Tonning.

Etablering

Kvam tek årleg imot flyktningar. Trivselsvaktmeistrane deltek saman med flyktningtenesta i etablering av bustad som skal stå klar når dei kjem til Kvam. Det gjeld mellom anna å skaffa og få på plass møblar, kjøkeninventar og utstyr til bad, og reia opp senger, så det er heilt klart til å flytta inn.

– Me vil gjerne utføra heimebesøk raskt etter dei kjem, for å gå gjennom branntryggleiken i bustaden, seier Tonning.

Nye flyktningar har gjerne manglande erfaring frå norske hus. Somme har gjerne ikkje kjennskap til bruk av komfyr, komfyrvakt og vaskemaskiner, og treng ein grundig gjennomgang av korleis dei ulike apparata fungerer. Kjeldesortering er noko vaktmeistrane brukar tid på å gå gjennom. Vidare opprettheld dei kontakten. Det dukkar opp mange spørsmål når ein ikkje er van med norske hus.

– Når me er på besøk til familiar eller personar som ikkje snakkar norsk, nyttar me ei tolketeneste på telefonen. Det fungerer veldig bra.

Ukrainarar i vente

– Får de ei sentral rolle når det gjeld ukrainske flyktningar?

– Det kan henda. Me veit ikkje så mykje enno. Det vert eit stort samarbeid mellom mange tenester. Me reknar med at me kjem til å involvera oss, seier Tonning.

Sandven-Burnett seier at hjelparane er svært tilgjengelege for flyktningtenesta. Ho reknar med at det vert kort varsel når ukrainarane byrjar koma. Vaktmeisterduoen er uansett innstilt på å vera fleksibel og mobil.

Fast samkome

Kvar veke samlast trivselsvaktmeistrane, teknisk eining, rus og psykisk helse, flyktningtenesta, sosialtenesta og Kvam bustadstifting til møte om kva statusen er for dei kommunale bustadene. Dette er ei ny ordning etter at prosjektet tok til.

– Prosjektet skal setja bustadsosialt arbeid meir på agendaen. Me skal auka kompetansen i alle tenester, ikkje berre hjå trivselsvaktmeistrane. Me må alle verta meir observante. Det å ha ein bustad er kjempeviktig og avgjerande for eit godt liv, seier Dolve.

Dei to vaktmeisterstillingane skal i utgangspunktet vara ut 2024. Utlysinga er årleg, men dersom Nav fylgjer opp rapportering og andre plikter, kan ein rekna med å få stønaden, fortel Dolve.

Nav Kvam bruka lang tid på å rekruttera og å sikra at prosjektet var retta mot behova internt og tverrfagleg før ein tilsette i stillingane, seier Langeland. Det gjorde at ein ikkje nytta alle lønsmidlane i 2021. Desse har ein fått vidareført.

Nav Kvam har fått tildelt 1,2 millionar kroner for kvart av dei tre prosjektåra. I tillegg har ein fått kompetansehevingsstønad.

Variert arbeidskvardag

Ingen dagar er like, og vaktmeistrane fortel at dei aldri veit heilt kva oppdrag som dukkar opp.

– Det er kjekt å jobba med menneske, og me er heldige som får møta folk på heimebane.

Målet er ikkje å overta andre tenester sine føremål, men supplera tenestene, utveksla kunnskap og høyra kva behov og forventningar leigetakarane har. Gjennom heilskapleg oppfølging vonar vaktmeistrane å bidra til ein forsvarleg og stabil busituasjon over tid, fortel dei.