Vaksinasjon vert flytta til nye lokale
Vaksineringa mot covid-19-sjukdom i Kvam, som tidlegare har vore i Øystesehallen, vert i slutten av august flytta til gymsalen i Steinsdalen.
Det opplyser Solveig Steine på den private facebooksida Aktuelt i Dalen. Ho skal vera med og organisera vaksineringa.
Rådmann Anita Hesthamar seier at grunnen til flyttinga er at elevane i Øystese treng hallen frå skulestart av.
Vaksinasjonen vert utført onsdagar og torsdagar i september og oktober. Ho vil ta ein del tid, og arbeidet held fram utover hausten. På grunn av ferieavvikling veit rådmannen enno ikkje om alt er klart til flyttinga.
Er med på dugnad
Heradet treng hjelp til nokre enkle oppgåver. Solveig Steine har fått i oppdrag å finna frivillige som kan hjelpa til med det praktiske under vaksineringa. Det er trong for seks frivillige kvar vaksinedag. Dei skal ynskja velkomen og visa til plassane, og passa på at folk spritar seg og tek på munnbind. Dei som set vaksinane, må få gjera det. Dei frivillige skal visa omsorg og hjelpa til viss nokon føler seg uvel. Så må stolane spritast når folk er gått.
Kari Nygård, avdelingssjukepleiar ved Kvam legevakt, spurde om Steine ville vera med. Steine har ikkje vore med tidlegare, men er ei god veninne av Nygård.
— Så då fekk eg den jobben, seier Steine.
— Du er dugnadssjef?
— Ja, kanskje det er det eg er. Me må få folk til å stilla kvar dag.
— Me brukar dei som er nærast, seier Steine.
Hjelper lag
Laget som eig Dalatun, Steinsdalen Samfunnshus P/L, får ein liten slant som gulrot for kvar frivillig i laget som er med på dugnaden.
— Alle moner dreg, seier Steine, som er frivillig i Dalatun òg.
Laget har ingen inntekter under pandemien, og utgiftene kjem sjølv om huset står tomt. Det har vore korkje bryllaup eller konfirmasjonar der i det siste.
— Dei som har ei lita stund ledig, må gladeleg melda seg til vaksinasjonsdugnad, seier Steine.
