– Våg å vera deg sjølv!
Det å kjenna seg utanfor var eit av fleire tema som vart drøfta då Kvam herad for første gong inviterte til oppvekstkonferanse.
Ei av stjernene på konferansen var tv-personlegdommen Leo Ajkic.
– Eg har sjølv hatt fordomar. Dei vart eg kvitt nettopp fordi kule menneske sa frå på ein kul måte. Det fekk meg til å føla at eg ikkje hadde følgt med i tida, og det gjorde at eg endra meg. Mange lid av det som eg kallar tilskodareffekten. Dei vågar ikkje å seia frå på grunn av frykt for å sjølv falla utanfor. Då vert det inga endring, sa han.
Orda fall i ein sofasamtale mellom Ajkic, fritidskoordinator Kristin Lundblad i Kvam og nestleiar i Kvam ungdomsråd, Malene Utskot. Samtalen fann stad på eit ope møte i Øystesehallen onsdag kveld.
Møtet var eit av fleire arrangement som var del av konferansen onsdag og torsdag. Konferansen hadde fått tittelen «Saman for ei inkluderande fritid». Ein raud tråd i konferansen var kva som kan gjerast for at alle skal kunna delta i fritidsaktivitetar.
– Ungdommen er først ute
I sofasamtalen diskuterte deltakarane korleis det er å vera interessert i upopulære aktivitetar. Ajkic minte om at det som har låg status no, kan verta det neste store.
– Ofte er dei unge først ute. Dataspel hadde lenge låg status, men er blitt stort også blant vaksne. Hip hop vart lenge sett ned på. No er det ein anerkjend sjanger. Difor er det viktig at dei vaksne er positive til det dei unge vil driva med, sa han.
Utskot lurte på kva som kan gjerast med vaksne som ikkje forstår korleis dei unge har det.
– Me har eit gamalt demokrati. Det er flest gamle folk som bestemmer. Difor er det viktig at du fortel om dei viktige tinga når dei vaksne spør korleis du har det. Då slepp ein kanskje eit lokalval der utbygging av hyttetomter vert eit viktig tema, sa Ajkic.
Han hadde fått med seg at Kvam vart kåra til årets ungdomskommune på Ungdomskonferansen i Måløy, og nytta høvet til å spørja Utskot om det er fortent.
– Ja, det vil eg seia. Vaksne i Kvam gjer veldig mykje for oss som er unge. Medlemene i Ungdomsrådet har møte- og talerett i heradsstyret og kan ta opp dei sakene me vil, svara ho.
– Møteplassar er viktige
Det opne møtet vart avslutta med ein panelsamtale leia av Ingunn Hildonen Teigland, koordinator for tverrfagleg innsats i Kvam. I samtalen snakka både lokale og tilreisande deltakarar om korleis ein kan gjera fritidsaktivitetar tilgjengelege for så mange som mogleg.
Mellom anna snakka deltakarane om kor viktig det er med fysiske møteplassar. Det kunne Daniel Olsen, som er styreleiar i Kvam E-sport, skriva under på.
– I Kvam mangla me som driv med e-sport, ein fysisk møteplass ganske lenge. Etter at me starta klubben, har me hatt ope tre dagar i veka. Alle kan koma, uansett alder. Folk kan spela eller prata med andre. Me har fått mange meldingar frå foreldre som tykkjer det er positivt at unge som sat heime i ein mørk kjellar og spela, no har fått ein fysisk møteplass, sa han.
Camilla Gangdal er mellom anna leiar i Ålvik idrettslag. Ho er samd.
– Møteplassar er viktige fordi det er kjekt å treffa andre. Eg trur det er viktig for heile samfunnet at folk kjem saman og får utveksla tankar og idear. Kanskje vert ein meir glad i plassen der ein bur dersom ein har ein stad å verta kjend med andre? sa ho.
– Noko for alle
Ifølgje Teigland ønskjer mange unge i Kvam fleire fysiske aktivitetar der det ikkje vert stilt krav til prestasjon. Paneldeltakar Håvard Markhus, som er leiar i Hardanger Bordtennisklubb, nytta høvet til å slå eit slag for klubben.
– Folk er ulike og ønskjer ulike ting. Me i bordtennisklubben vil vera både for dei som ønskjer å trena ofte for å verta gode, og for dei som ønskjer å stikka innom og trena ein gong iblant, sa han.
For Hilde Børven, som har engasjert seg både i handball og fotball, er det å vinna viktig.
– Eg likar å vinna, men som trenar måtte eg gje alle ei oppgåve. På laga eg har trena, har det vore dei som ville bli best mogleg, men også dei som berre var med fordi det var eit trygt og godt miljø. Då var det viktig å finna ei oppgåve som passa til kvar spelar. Det skal vera plass til både dei som vil vinna og dei som berre vil vera med, men eg tykkjer ikkje me skal vera redde for å konkurrera, sa ho.
– Årleg konferanse
Oppvekstkonferansen starta onsdag morgon med fagdag for tilsette i Kvam herad og nokre samarbeidspartnarar. Sjølve opninga stod ordførar Torgeir Næss for. Til stades var barne- og familieminister Kjersti Toppe (Sp). Ho nytta mellom anna nytta høvet til å gratulera Kvam med den ferske prisen.
Torsdag var det fritidsmesse i Øystesehallen. På messa synte fritidsaktørar i Kvam kva dei har å by på. På dagtid var messa open for skulane. På kveldstid var den open for alle.
Oppvekstkonferansen er den første i sitt slag. Ifølgje rådmann Anita Hesthamar skal konferansen verta eit årleg innslag. Tema og dimensjon på arrangementet vil variera frå år til år.
