Utviklar hjelpemiddel til aktivitet
Stian Kvalvik har alltid vore glad i fysisk aktivitet. Han ynskjer at personar med redusert rørsleevne skal få fleire moglegheiter til å vera aktive.
25-åringen frå Norheimsund seier at han alltid har vore oppteken av at alle skal få oppleva gleda med å vera aktiv og driva med idrett. Sjølv har han delteke i ulike idrettar opp gjennom åra, i tillegg til å vera trenar i barnefotballen.
Han er også ein praktikar, fortel han.
— Eg har alltid lika å dulla med noko — å laga og utvikla ting, seier Kvalvik.
Tenkja nytt
Idrettsinteressa førte til at han byrja på idrett på vidaregåande. Seinare tok han ein bachelor i idrettsvitskap i Kristiansand. Etter han var ferdig med den treårige utdanninga, lura han på vegen vidare.
— Eg har alltid lika å jobba med menneske. Då eg oppdaga ergoterapi, tenkte eg at det kunne vera noko for meg, fortel 25-åringen frå Norheimsund.
Han flytta til Oslo og byrja på grunnfag i ergoterapi. Der vart han introdusert for Exero, eit gründerselskap som jobbar for å utvikla aktivitetshjelpemiddel for dei med redusert rørsleevne. Ein av gründerane vitja klasserommet, der han hadde ein produktpresentasjon og oppfordra studentane om å søkja på ei deltidsstilling i selskapet. Kvalvik nytta høvet og kombinerte jobben med studiet.
— Her såg eg moglegheita til vera med på å tenkja nytt og skapa noko som kunne bidra til at fleire får sjansen til å vera aktive, seier Kvalvik.
Reiser landet rundt
Då Kvalvik var ferdig med grunnfaget, valde han å slutta på studiet, for å jobba fulltid i selskapet. No jobbar han med produksjon og utvikling. Han køyrer også landet rundt for å syna fram og lata andre få prøva produkta, i tillegg til å levera dei til nye eigarar.
Exero vart etablert i 2017. Sidan har det vorte utvikla og lansert tre aktivitetshjelpemiddel, som i Noreg vert selde gjennom NAV Hjelpemiddelsentral, opplyser gründerane i ei pressemelding. Hjelpemidla legg til rette for trening på barmark og i skiløypa.
Ifylgje gründerane har responsen vore svært god. Dei får stadig meldingar frå personar som endeleg kan vera aktive med familie og vener, vera med på turar og trening, og generelt koma seg ut på ein ny og enklare måte, opplyser dei.
Selskapet har store nasjonale og internasjonale mål om produksjonsauke og utvikling av nye produkt, og er difor i desse dagar i gang med ein ny investeringsrunde.
