Utviding møter motbør

Øystese Båtlag ynskjer å utvida småbåthamna ved Evjo i Øystese. I kommuneplanen frå 2019 er området sett av til framtidig småbåthamn, men ei bryggje og ein bølgjedempar føreset dispensasjon frå kravet om reguleringsplan. Søknaden vart send til Kvam herad i august.

Saka vart send på høyring til ulike offentlege instansar i november. Rådmannen skriv i høyringsbrevet at tiltaket er relativt stort og at konsekvensane for naboeigedomen vert opplevde som store, men at plan, lov eller nasjonale eller regionale interesser ikkje vert sette vesentleg til side. Det avgjerande er såleis om fordelane med tiltaket er klart større enn ulempene, skriv ho.

Sjølve tiltaket i sjø er i tråd med overordna plan, skriv rådmannen i vurderinga, men ho ser òg at det som skal skje på land, talar for at det er naudsynt å regulera. Fleire sende merknader etter nabovarslinga.

Rådmannen sin konklusjon er at vilkåra for dispensasjon ikkje er oppfylte, og at utviklinga av området bør skje gjennom ein detaljreguleringsplan. Tysdag 31. januar skal saka avgjerast av planutvalet.

Ueinige om ulemper

Ifylgje rådmannen er fordelane med å gje dispensasjon at det er eit samfunnsgode at Øystese får ei gjestebåthamn, som igjen vil føra med seg auka aktivitet. Det vil også opna for at fleire innbyggjarar kan få seg båtplass.

Ulempene, meiner ho, er at dispensasjonen ikkje vil avklara kva aktivitet utvidinga kan medføra på land, at parkeringsløysingane ikkje ser ut til å vera i tråd med krav til parkering, at plassering av gangveg mot sentrum ikkje er avklara og at vegløysing med plass å snu som ligg i dagens reguleringsplan ikkje er etablert. Planen er eldre enn ti år, og det er av den grunn ikkje høve til å oreigna areal for å etablera ein fullgod snuplass, skriv ho.

Øystese Båtlag sende i byrjinga av desember eit tilsvar til høyringsbrevet. Laget påpeikar mellom anna at det ikkje er planar om å utvida området vestover mot gruslageret til Jan Mo AS. Båtlaget ynskjer berre å tydeleggjera eksisterande veg og merkja parkeringsplassar på eksisterande opplags- og parkeringsplass.

– Stemmer med krav

Rådmannen er i tvil om utforminga av parkeringsplassen er i tråd med handboka til Statens vegvesen. Parkeringsarealet er ifylgje båtlaget teikna etter Byggforskserien, som gjev dokumenterte løysingar og tilrådingar for prosjektering, utføring og forvalting av bygg. Parkeringa stemmer dessutan med vegvesenet sitt krav til skråoppstilling. Båtlaget påpeikar likevel at det vert søkt om rammeløyve og at løysinga eventuelt vert detaljert i prosjekteringsfasen.

Rådmannen peikar vidare på at det er uheldig at det i søknaden ikkje er teke omsyn til ein framtidig gangveg til sentrum. Båtlaget synest det er positivt at Kvam herad planlegg ein gangveg i området, men er ikkje kjent med kvar denne er tenkt plassert.

Uroa for freda fugleartar

Statsforvaltaren rår frå dispensasjonen. Han skriv at tiltaket er relativt stort, og at mange verdiar må utgreiast og vurderast på ein forsvarleg måte, mellom anna knytt til naturmangfald, friluftsliv og landskapsverknader.

Området kring tiltaket har eit rikt fugleliv, mellom anna med freda artar av nasjonal forvaltingsinteresse. Også ureining, støy, trafikktryggleik og parkeringstilhøve må vurderast godt, står det i uttalen.

Søkjaren viser til at ein reguleringsplan for området truleg må ta fleire omsyn og av den grunn vil vera kompleks og tidkrevjande.

– Føremålet med ein reguleringsplan er å gjera naudsynte avklaringar knytte til ulike viktige tilhøve. I denne samanheng er det slik vi kan sjå fleire viktige tilhøve som treng forsvarleg planavklaring, skriv Statsforvaltaren.

– Uoversiktleg område

Vestland fylkeskommune meiner det vil vera uheldig å etablera parkeringsplass og gjestehamn gjennom ein dispensasjon.

– Det føregår ulike aktivitetar i området som gjer at det vert ei blanding av lastebilar, personbilar og tilhengarar, i tillegg til mjuke trafikantar, skriv fylkeskommunen.

Fylkeskommunen tilrår difor vurderingar av trafikktryggleik, tilkome for mjuke trafikantar og parkering, og meiner dei bør gjerast gjennom ein planprosess.

Området frå fylkesveg 79 til småbåthamna er uoversiktleg, meiner fylkeskommunen, og det er dessutan ikkje tydeleg kvar dei mjuke trafikantane skal ferdast. Køyrevegen er heller ikkje opparbeidd i tråd med gjeldande reguleringsplan, står det i tilbakemeldinga.