Utvidar veg i Ålvik
Vestland fylkeskommune utvidar fleire smale punkt på fylkesveg 79 aust for Ålvik sentrum.
Det stadfestar overingeniør og prosjektleiar Einar Selland.
Vegen skal etter kvart utvidast på strekkja frå Kjepsohøgda og ned til Tyrvefjøra.
– Me har eit løynleg håp om at det skal verta tofelts veg på heile strekkja når me er ferdige, seier Selland.
Arbeidet vil vara om lag eit års tid. Selland vonar å verta ferdig med den verste stenginga til våren, før turisttrafikken slår inn.
Jordalen Entreprenør AS på Voss vann anbodskonkurransen og gjer arbeidet. Seks verksemder gav pris, men Jordalen var billegast, seier Selland. Kostnaden med arbeidet er om lag 40 millionar kroner.
Åtte personar er for tida i arbeid med hogging og trafikkdirigering. Dei jobbar frå klokka 7 til 17.
Arbeidet består for det meste av skyting av fjell. Massane skal brukast til utfylling på sjøsida eit par hundre meter.
– Er det krevjande arbeid?
– Ja, på toppen er det krevjande. Det er nokre skjeringar på over 20 meter på Kjepsohøgda. Me lagar hyller og trappar oss ned etter kvart. Me tek det i tre ulike etappar, så me kan arbeida trygt og ikkje øydeleggja vegen. Frå den nedlagde gjestgjevarstaden og nedover er det enkelt arbeid, seier Selland.
Ifylgje veier24.no skal to strekkjer på parsellen Kjepso–Tyrvefjøra på høvesvis 1.164 og 831 meter utbetrast. Sluttdato er 30. september 2024, skriv nettstaden.
