Utval greip ikkje inn for å sikra styringsgruppe

Som HF har opplyst, rår fylkesdirektøren frå å oppretta eit «formelt organ» som skal sikra framdrift i arbeidet med å planleggja tunnelar forbi Tokagjelet og mellom Nordrepollen og Austrepollen.

Han meiner handsaminga av planane bør vera i tråd med dei ordinære prosessane som plan- og bygningslova tilseier. Statens vegvesen skal elles oppretta ei styringsgruppe for å leia arbeidet med oppfylging av konseptvalutgreiinga av «armen» frå E134 til Bergen.

Initiativet til å oppretta ei eiga politisk styringsgruppe der vertskommunane deltek og sikrar framdrift i tunnelplanane, kom frå Sigrid Brattabø Handegard (Sp) i fylkesutvalsmøtet 19. september. Ho sa til HF sist veke at fylkeskommunen må finna ei praktisk løysing for å koma vidare i dei to tunnelprosjekta, uavhengig av kva styringsgruppa heiter.

Då hovudutvalet drøfta saka 19. november, tok ingen til orde for noko anna enn å ta saka til orientering. Fylkesdirektør for samferdsle og mobilitet, Dina Lefdal, oppmoda politikarane å stilla spørsmål om formalitetane i saka når rett kompetanse er på plass i fylkesutvalsmøtet 25. november. Fylkestinget skal avgjera saka 11.–12. desember.

Trude Brosvik (KrF) sa at fylkesdirektøren gjennom saka leier saka inn i eit rett spor – eit spor også andre vegprosjekt må fylgja. Ho røysta, som den einaste representanten, mot framlegget frå Handegard i september.

Det har etter valet av armtrasé i regjeringa i haust vore eitt digitalt møte mellom fylkeskommunen, dei råka kommunane og lobbyismeselskapa E134 Haukelivegen AS og Hordalandsdiagonalen AS. Ifylgje saksutgreiinga var konklusjonen i møtet at ein skulle oppretta eit «politisk kontaktutval». Ordførar Torgeir Næss (Ap) i Kvam herad, som deltok i møtet, har ikkje høyrt meir om saka.

Siste nytt om dei to tunnelprosjekta er at reguleringsplanane er venta klare ein gong mellom nyttår og sommaren. Så seint som i oktober varsla fylkesdirektøren at planframlegget skulle vera klart før nyttår.