Utsette sak om framtidig tilbodsstruktur
Prosessen i saka om den framtidige tilbodsstrukturen i Vestland fekk kritikk då hovudutval for opplæring og kompetanse samlast til møte onsdag.
Før sakshandsaminga orienterte Torild Natvik, seniorrådgjevar i avdelinga for opplæring og kompetanse i Vestland fylkeskommune, om den heilskaplege planen. Også yrkesopplæringsnemnda var til stades.
Fylkesdirektøren la nyleg fram eit justert forslag etter ein høyringsrunde tidlegare i år. I møtet fekk deltakarane høyra om dei viktigaste endringane i forslaget, som har skapa både engasjement og kritikk. I tilrådinga føreslår fylkesdirektøren mellom anna å leggja ned fagtilbodet VG2 industriteknologi ved Kvam vidaregåande skule. Lina dannar grunnlag for læreplass i 27 fag.
– Dette overraska eigentleg alle, og dette må me prøva å få snudd, sa ordførar Torgeir Næss (Ap) til HF måndag.
– Halvferdig
Då sakshandsaminga omsider kom i gang, stod Espen Edvardsen (Ap) fyrst på talarlista. Han fremja på vegner av alle partia eit forslag om å utsetja saka. Det vart samrøystes vedteke, men ikkje før Martine Jordana Baarholm (Frp) hadde sagt litt om kva hennar parti tykkjer om prosessen.
Innstillinga inneheld nye element som ikkje har kome fram i lyset før ho vart send ut. Heller ikkje skulane har fått høve til å kommentera, og det er under all kritikk, sa Baarholm.
– Her har ein lagt fram noko som – i mangel på andre ord – er halvferdig, sa ho.
Også Eivind Johannesen i Utdanningsforbundet, medlem i yrkesopplæringsnemnda, ytra seg om prosessen. Som Baarholm kritiserte han at dei skulane som i tilrådinga frå fylkesdirektøren har fått endringar av negativ karakter, ikkje har vore klar over det.
– Dei har ikkje fått høve til å mobilisera og reagera, og no lyt dei be til politikarane på veldig, veldig kort varsel om å få gjort endringar. Det synest me er uheldig, sa Johannesen.
– Vil ikkje laga problem
Åsmund Berthelsen, leiar for hovudutvalet, seier på fylkeskommunen si heimeside at saka krev og fortener ei grundig handsaming, og at utvalet difor ynskjer å bruka meir tid.
Eit nytt møte er sett opp 11. september. Også yrkesopplæringsnemnda og fylkesutvalet skal ha saka til handsaming, før fylkestinget gjer endeleg vedtak i eit møte 1.–2. oktober.
Bjørn Lyngedal, direktør for opplæring og kompetanse i fylkeskommunen, forsikra dei folkevalde om at tilrådinga på ingen måte er eit slags forslag for å leggja ned tilbod eller skular på sikt.
– Me prøver å bevara strukturen, men me har færre elevar om ti år. Hensikta er ikkje å laga problem, sa Lyngedal.
To i éin?
Bjarte Helland (INP) sende inn spørsmål til administrasjonen før møtet. I skrivet hevdar han at Kvam vidaregåande skule ynskjer å prøva ein modell med delte klassar i dei faga ein ikkje har nok søkjarar til å fylla ein heil klasse i. Kunne det vore ei løysing for fleire av skulane? spør Helland.
I svaret skriv administrasjonen at den nemnde løysinga er føreslegen på enkelte skular. Til dømes er ein VG2-klasse sett saman av elevar både på tømrar og betong og mur. Elevane på betong og mur får då all opplæring i programfag i ei bedrift, medan dei har fellesfaga på skulen, skriv administrasjonen.
Ei slik løysing krev eit tett og forpliktande samarbeid mellom skule og næringsliv. Ein generell risiko er at ein aktør av ulike årsaker kan koma til å trekkja seg frå samarbeidet. Då står fylkeskommunen uansett med ansvar for å gjennomføra opplæringa, svara administrasjonen.
