Utsette handsaming av MOT-avtale
Kommunestyret i Ullensvang utsette handsaminga av det haldningsskapande tiltaket MOT, men no nærmar det seg ei avgjerd.
Førebels er avtalen ikkje oppsagd, men sett på vent for eit politisk vedtak, opplyser rådmann Ole-Jørgen Jondahl. Han har tilrådd å seia han opp.
Kommunestyremedlem Emil Tomasgard (Ap) føreslo i kommunestyremøtet 9. september at saka om MOT-avtalen vart utsett til neste møterunde, og det vart vedteke mot éi røyst.
– Kommunestyret utsette saka fordi ho bør gå via utval for oppvekst og levekår, slik at ein fylgjer retningslinene, seier Morten Vevatne, kommunalsjef for oppvekst og utdanning.
Saka kjem opp att i utvalet 6. oktober. Kommunestyret avgjer henne 21. oktober.
Lindskog-Lund ugild
I eit forslag frå Sp sa Lajla-Margrethe Lindskog-Lund at kommunestyret burde vedta at Jondal skule får halda fram med MOT-programma «Robust ungdom 12–16» og «Skolen som samfunnsbygger».
Sp meinte òg at budsjettramma til Jondal skule burde aukast tilsvarande utgiftene knytte til MOT-programma, finansiert frå bufferfond i 2020. Partiet bad òg om at Ullensvang kommunestyre måtte be rådmannen innarbeida kostnader med MOT-deltaking i budsjettforslaget for 2021.
Det vart stilt spørsmål om habiliteten til Lindskog-Lund av di ho er avdelingsleiar ved Jondal skule, og ho vart samrøystes sett på sidelina. Også rektorane ved andre skular i kommunen vart ugilde i saka.
– Har sjølv kompetanse
Ullensvang kommune har i dag tilsett både SLT-koordinator og ungdomskontakt. SLT står for Samordning av lokale rus- og kriminalitetsførebyggjande tiltak.
Målet med SLT er svært likt det arbeidet som vert fokusert på av MOT-organisasjonen. I tillegg er ein no i sluttprosessen i det nasjonale og lokale læreplanarbeidet for grunnskule og vidaregåande med fagfornyinga. Viktige tema her er folkehelse og livsmeistring. Dette er eit arbeid som er lovpålagt.
Administrasjonen meiner at Ullensvang har eigen kompetanse mellom dei tilsette som kan utføra eit godt arbeid knytt til fagfeltet, og ser difor ikkje at det er behov for eit medlemskap i MOT. Studerer ein resultata av undersøkingar, syner ikkje dette nokon positiv trend som direkte kan skuldast MOT-arbeidet.
Det har i dei tre føregåande kommunane vore satsa på kompetanseheving mellom eigne tilsette, noko som er av stor verdi for det kontinuerlege førebyggjande arbeidet, ifølgje rådmannen.
Ut ifrå saksvurderinga tilrår ein ikkje å inngå avtale med MOT for Ullensvang kommune, og avtalen knytt til tidlegare Jondal kommune vert oppsagt, skriv rådmannen. Rådmannen tilrår at kommunestyret i staden ber administrasjonen syta for at haldningsskapande arbeid er eit sentralt element i planar for oppvekst og utdanning i Ullensvang kommune.
