Utset prosjekt til 2025
Truleg må både restaurering av Strandebarm kyrkje og bygging av namna minnelund i Øystese venta litt til.
Båe prosjekta har støytt på uventa utfordringar, opplyser kyrkjeverje Olav Skeie Lid i meldingane til møtet i kyrkjeleg fellesråd 18. september.
Når det gjeld kyrkjevøla, er det stor uvisse kring omfang og metode. Mange instansar, mellom dei Riksantikvaren, skal ha eit ord med i laget. Mellom anna heving av taket, materialval, skiferkombinasjonar og byte av vindaugo vart problematiserte tidleg i prosessen, syner eit skriv i februar, signert seniorrådgjevar Terje de Groot i seksjon for kyrkjesaker hjå Riksantikvaren. Han hadde då lese tilstandsrapporten om kyrkjetaket frå Akasia, med tilhøyrande tiltak.
«Man bruker ikke impregnerte materialer i kulturhistorisk viktige bygninger», skreiv han mellom anna. Vidare slår han fast at vindaugo ikkje vert bytte i antikvarisk vøle, med mindre dei har rotna meir eller mindre vekk.
– Ting tek lengre tid enn ei utolmodig kyrkjeverje hadde sett føre seg, konstaterer Lid, som vil informera meir om saka i sjølve møtet.
For minnelunden sin del, har det teke tid å avklara innfesting av namneplater. Truleg går komande vinter med til testing og søknadsprosess.
Kvam herad skal ha fått informasjon om at prosjekta vert overførte til 2025.
