– Utset planarbeid!
Naturvernforbundet i Hardanger meiner Kvam herad har heimel til å avslå ein dispensasjonssøknad om å henta ut stein.
Som HF har skrive før, håpar Elisabeth Eide Haugstad å få godkjent prøvedrift før steinuttaket på Eide i Tørvikbygd er regulert.
Det ynskjer ikkje Klaus Rasmussen, leiar i Naturvernforbundet i Hardanger. Han har sendt Kvam herad ein merknad til dispensasjonssøknaden.
I brevet viser han til merknaden Naturvernforbundet i Hardanger sende inn 14. november i fjor, i samband med reguleringsplanen og planprogrammet for det same området. Rasmussen påpeikar at det i dispensasjonssøknaden kjem fram at det vart teke ut 50.000 kubikkmeter stein då fjøstomta vart lagd til rette, og at det no vert søkt om å ta ut inntil 9.000 kubikkmeter som eit prøveuttak i eit område som skal regulerast.
Området er i dag definert som landbruks-, natur- og friluftsområde. Naturvernforbundet meiner at uansett føremål må planar om omdisponering av så store naturområde vurderast i ein større samanheng, det vil seia i kommuneplanen.
Ut frå denne planen og saksopplysingane meiner Naturvernforbundet at heradet har heimel til å avslå søknaden og utsetja planarbeidet. Forbundet ynskjer heradet vurderer kommuneplanen før ein går inn i enkeltsaker med reguleringsplan.
– Slike saker viser seg ofte å vera meir kompliserte og tidkrevjande når ein vil omgå kommuneplanen, skriv Rasmussen.
Les meir her:
